هەڵەبجەی تەمەن
هەڵەبجەی تەمەن ‌ 16/3/2017
ئیسماعیل محەمەد
بە یادەوەرییەكانی مناڵیی (ئازاد تۆفیق) پێشكەشە

جارێكی تر هەڵەبجەكەت ...
وەك جاران نابینیتەوە
كۆڵانەكانی مناڵییت...
تێكچوون نایانناسیتەوە

كوا هەڵەبجەكەی جارانت ؟!
 هیچی وەكوو خۆی نەماوە
ماڵە دڵنشینەكەشتان...
هەروەكوو دڵت روخاوە

ئەمێستا هەڵەبجە بۆ تۆ...
شاری حەسرەت و برینە
ئەوەی بۆ تۆ ماوەتەوە...
تەنها یادگاریی شیرینە
 
نوقڵی قسە خۆشەكانی ...
بارام بەگت گوێ‌ لێ‌ نابێ‌
من ئەزانم دڵخۆشیی تۆ...
رەنگە لای ئەو بەجێ‌ مابێ‌

دادە دۆی نەما تا بڕژێ‌ ...
ئیتر داراش دار نابینێ‌
دەرگای مەكتەب ناكرێتەوە و...
مام زۆراب مێوژ ناهێنێ‌

ئای لەو رۆژەی خواحافیزییت...
لە هەڵەبجەی تەمەنت كرد
بە رۆحێكی لەت لەتەوە...
رێگەی هات و نەهاتت گرت

تۆ بەم دڵە كەیلەتەوە...
بەرەو كوێوە هەنگاو ئەنێی
چۆن بە تەنیا جێی ئەهێڵی...
هەڵەبجە لای كێ‌ دائەنێی؟!
* * *

ئای هەڵەبجە چەند بێكەس و...
چەند تەنیا بووی لە شانزەی سێ‌
لەو رۆژەوە هەتا ئێستاش...
ئاگر لە جەرگت هەڵئەسێ‌

كێ‌ دیوویەتی لە یەك كاتا...
پێنج هەزار ئازیزی بمرێ‌ ؟!!
كێ‌ ئەتوانێ‌ بەرگەی كۆستی...
شارە شیرینەكەی بگرێ‌ !!

عومەری خاوەر چەندی كرد...
گاز كۆرپەكەی نەخنكێنێ‌
هەتا ئێستاش ئەو دیمەنەی...
ناخ و رۆحمان ئەبرژێنێ‌
چەند ئەستەمە سەر هەڵگرتن
ماڵئاوایی كردن لە شار...
چەند سەختە ماڵ بە جێ‌ هێشتن
بەرەو چارەنووسی نادیار
 
بمبەنەوە بۆ رابردوو ...
بۆ گەڕەكە سادەكەمان
بۆ لای میهرەبانیی دایكم...
بۆ ماڵە پڕ یادەكەمان

ئێستاش كە سەر ئەدەمەوە
خۆم بۆ جاران ئەبەمەوە
مناڵییم بیر ئەخەمەوە
مەیلم تازە ئەكەمەوە

هەڵەبجەكەی نوری چاوم
بە یادی جارانت ماوم
لە كوێ‌ بم وای لە هەناوم
بۆ ساتێ‌ لێت دانەبڕاوم

هەڵەبجەی ئەحمەد موختار جاف
مەڵبەندی خەڵكی سینەساف
ئێستاش بەو هەموو زامەوە
تۆ هەر جوانی بەلامەوە

پایزی 2016
* كتێبی ( پیرمحەمەو ... فڕین بەرەوماڵی خۆڵەپەتێ‌ ) ی برای نووسەر كاك ئازاد تۆفیق ئیلهامی نوسینی ئەم شیعرەی پێ‌ بەخشیم.


ناو:  
ئیمه‌یل:    
سه‌رنج:  

#7396
22/10/2017
ئه‌رشیف
وه‌رزش
‌ گه‌وره‌ترین پاڵه‌وانی بازی به‌رز وازهێنانی راگه‌یاند 22/10/2017
‌ ئه‌ندام په‌رله‌مانێكی به‌ریتانیا به‌هۆی كاری ناوبژیوانی هه‌را ده‌نێته‌وه‌ 22/10/2017
زانست
‌ هه‌سارۆكه‌یه‌ك سڵاوی له‌ زه‌وی كرد و رۆیشت 19/10/2017
‌ چه‌ند خۆراكێكی گرنگ بۆ وه‌رزی پایز 19/10/2017
‌ كاریگه‌ری‌ ته‌له‌فزیۆن له‌ دروستكردنی‌ ترس لای‌ بینه‌ر 19/10/2017

© 2009 KURDISTANY NWE, All RIGHTS RESERVED. | CREATED BY AVESTA GROUP