خەون و خۆزگەكانی مرۆڤ
خەون و خۆزگەكانی مرۆڤ ‌ محه‌مه‌د کوردۆ‌ 21/9/2017
دەمەوێت لە ڕێی دوو نمونەوە بەخێرایی چەند شتێك لە بارەی خەون و خۆزگەكانی مرۆڤەوە بڵێم. نمونەی یەكەم: لە درامای (ژنی بابەدا) كە درامایەكی ئێرانیی دۆبلاژكراوە، لە جێیەكدا (كاك عەزیز)ی پاڵەوانی سەرەكی دراماكە بە منداڵەكانی دەڵێت: من ئیدی دوای دایكتان ناتوانم بە تەنیا بژیم، دەمەوێت ژن بێنم.  بەڵام منداڵەكانی بە بیانووی ئەوەی كە باوكیان پیر بووە، دژی داواكارییەكەی دەوەستن. ئەویش پێیان دەڵێت: ((بۆچی من كە پیرم ئیدی مرۆڤ نیم؟ ئیدی خەون و خۆزگەم نییە؟)). نمونەی دووەم: لە ناوەڕاستی هەشتاكاندا هێشتا هەرزەكار بووین، جارێكیان هاوڕێیەكمان كە كوڕی شێخێكی ناودار بوو، باسی كارێكی كرد كە بە تێگەیشتنی ئەو كاتەی ئێمە، بۆ ئەو، نەشیاو بوو، یەكێك لە هاوڕێكانمان لێی پرسی: سەیرە كوڕە شێخیش كاری وا دەكات؟ ئەویش وتی: ((بۆچی كوڕە شێخ مرۆڤ نییە؟ كوڕە شێخ خەون و خۆزگەی نییە؟)). بە داخەوە لە كۆمەڵگای ئێمەدا، زۆر جار بە بیانووی جیاجیاوە، مرۆڤ لە خەون و خۆزگەكانی دادەماڵرێت. تۆ لەبەر ئەوەی پیریت و ئەو لەبەر ئەوەی كوڕە شێخە و ئەوانی دی لەبەر ئەوەی كچن، ژنن، بێوەژنن، ئیدی بۆتان نییە خەون و خۆزگە مرۆڤانەییەكانی خۆتان تاقی بكەنەوە. بە داخەوە خەڵكی ئێمە زۆر جار لە بیریان دەچێت، كە لە ناو سنگی هەر مرۆڤێكدا، ئیدی لە هەر تەمەنێك و لە هەر شوێنێك و لە هەر پلە و پایە و ئاستێكدا بێت، دڵێك هەیە، هەر ئەوەندە خۆشە ئەو دڵە دووچاریی پەرێشانی نەبێت، كە بوو، ئیدی هیچ جۆرە ناو و نازناو و ناونیشانێك ناتوانن ئارامی بكەنەوە. ئاخۆ بەسەرهاتی شێخی سەنعان چیمان پێ‌ دەڵێت؟ پێمان دەڵێت: مرۆڤ كە دڵی پەرێشان بوو، ئامادەیە بۆ ئارامكردنەوەی دڵی، دەستبەرداری هەموو ئەو شتانە ببێت كە بە درێژایی ژیانی لە پێناویاندا ڕەنجی كێشاوە. ئەی ئەوە نییە ئەم شێخە خواپەرستە بۆ كچە گاورێك هەم پشت لە شاری مەكە دەكات،  هەم موریدەكانی خۆی جێ‌ دەهێڵێت، هەم دەبێتە بەرەزەوان و هەم تەواوی مێژووی خواپەرستیی خۆیشی لە بیر دەكات؟ بەسەرهاتی شێخی سەنعان پێمان دەڵێت: مرۆڤ بۆ ئەوەی دەستبەرداری خەون و خۆزگەكانی نەبێت، دەتوانێت تا دوور بڕوات، زۆر دوور.

ناو:  
ئیمه‌یل:    
سه‌رنج:  

#7395
20/10/2017
ئه‌رشیف
وه‌رزش
‌ ئیتالیا مه‌ترسی گه‌وره‌ی سه‌رنه‌كه‌وتنی بۆ مۆندیال له‌سه‌ره‌ 19/10/2017
‌ رۆناڵدۆ زیندانی دەکرێت؟ 19/10/2017
زانست
‌ هه‌سارۆكه‌یه‌ك سڵاوی له‌ زه‌وی كرد و رۆیشت 19/10/2017
‌ چه‌ند خۆراكێكی گرنگ بۆ وه‌رزی پایز 19/10/2017
‌ كاریگه‌ری‌ ته‌له‌فزیۆن له‌ دروستكردنی‌ ترس لای‌ بینه‌ر 19/10/2017

© 2009 KURDISTANY NWE, All RIGHTS RESERVED. | CREATED BY AVESTA GROUP