زیاتر لە هەفتەیەك بەسەر كاتی مووچەی مانگی نیسانی فەرمانبەرانی هەرێمدا تێپەڕیوە و هەواڵی كەوتۆتە ناو بەرداشی لێدوانەكانەوە. لەڕووی پیشەییەوە، ئەركی میدیاكانە لە هەرێم كە بەدواداچوون بۆ هۆكاری ئەم كێشە نەبڕاوەیە بكەن.
لەم پرسەدا، پیشەییبوون، وەك زۆر كەیس و دۆسێی تر، دەكەوێتە پێش دروشمی سیاسییەوە، چونكە هەم پەیوەستە بە رەچاوكردنی قووتی هاووڵاتیانەوە، هەم گواستنەوەی فاكت و زانیارییش. لەوەش زیاتر كورد لە هەرێم، بە ئیرادەی خۆی، عیراقێكی فیدراڵی هەڵبژاردووە، كێشەكەی لەگەڵ دەوڵەتێكی تردا نییە، پرسەكە سەنگەر لەیەكگرتنیش نییە. دیفاكتۆ ئەوەیە كە ئێستا مووچە لەژێر رەحمەتی بڕیارەكانی دادگای فیدراڵی و یاسای بودجەدایە، كە ئەمیان ناچێتە بواری جێبەجێكردنەوە، ئەوا یەكەمیان كارپێكراو دەبێت.
لەلایەكی تر، هەر رووماڵێك ببێتە هۆی بەرچاوڕوونیی رای گشتیی هەرێم، شێوازێكە لە كوردایەتیش. كوردپەروەریی ئەوە نییە لەگەڵ هاوزمانەكانی خۆتدا روون نەبیت، بەتایبەتی كە چۆن بچیتە بنج و بنەوانی دۆسێكەوە، لەكۆتاییدا بەرپرسیارێتیی دواكەوتنی مووچە، پێش بەغدا، بەرۆكی هەرێم خۆی دەگرێت، ئەمەش نەك لەبەرئەوەی عیراق سەرڕاستە، بەڵكو لەبەرئەوەی داواكارییەكانی روونن: تەوتین و رادەستكردنی داهاتی نانەوتی.
ئەو داواكارییانە، كەمكردنەوەبن لە پێگەی هەرێم، یان پشتبەستن بن بە بڕیارەكانی دادگای فیدراڵی، یەك دەرەنجامیان هەیە: بێ جێبەجێكردنیان، مووچە مسۆگەر نییە، ئەمەش لە زیانی خەڵكی هەرێمە، قووتی خەڵكیش لە گەردنی دەسەڵاتی هەرێمدایە پێش عیراق، بۆیە وەك زۆرێك لە پەرلەمانتارانی كورد لە بەغداوە داوای دەكەن، پێویستوایە دەستپێشخەرییەكانی چارەسەر لەخۆمانەوە بن.
