بڕیارە سبەینێ، دادگای فیدراڵی عیراق لە سەر دوو دۆسێی تایبەت بە هەرێمی کوردستان کۆ ببێتەوە.
دۆسێی یەکەمیان تایبەتە بە ئاوارەكان لە هەرێمی كوردستان و داواکراوە کە هەرێم، کەمپەکان دابخات و ئاوارەکان بگەڕێنێتەوە.
سكاڵاكە لەلایەن ئیڤان فایەق وەزیری كۆچ و كۆچەرانی عیراق لەسەر هەریەك لە سەرۆكی هەرێمی كوردستان و سەرۆكی حكومەتی هەرێمی كوردستان و وەزیری ناوخۆی هەرێم تۆماركراوە و داوای گەڕانەوەی ئاوارەکان دەکات.
سکاڵاکە تایبەتە بە ناچاركردنی هەرێمی كوردستان بۆ جێبەجێكردنی بڕیارێكی حكومەتی عیراق كە داوای لە هەرێم كردوە تا 30ی حوزەیرانی 2024 هەموو ئاوارەكان بگەرێنێتەوە بۆ زێدی خۆیان و كەمپی ئاوارەكانیش دابخات.
هاوکات سكاڵای دووەم لەسەر داوای نەهرۆ مەحمود قادر، ئەندامی ئەنجوومەنی نوێنەرانی عیراق کراوە کە تێیدا سکاڵا لەسەر سەرۆك وەزیرانی عیراق و ئەمینداری ئەنجومەنی وەزیران و وەزیری نەوتی عیراق تۆماركراوە لەبارەی نادروستی دیاریكردنی نرخی نەوتی سپی بۆ هەرێمی كوردستان.
