ئا: كوردستانی نوێ
كۆسرەت رەسوڵ
بۆ هەیئەی كەركوك
پاش خۆڕاگرتن و نەدركاندنی هیچ زانیارییەك، كۆسرەت رەسوڵ و تەواوی برادەرانی بۆ هەیئەی خاسەی كەركوك دەگوازرێنەوە.
تەڵعەت خدر لە چاوپێكەوتنێكی تایبەتدا بۆ نووسەری ئەم كتێبە دەڵێت: - (ئێمەیان بۆ هەیئەی خاسەی كەركوك برد و لە رێگا بینیمان نووسرابوو، تەریق دبس، ئەوە هەیئە گەورەكە بوو، جاری یەكەم ئێمەیان بۆ ئەوێ برد، خوا كردی، ئەندامانی هەیئەی تەحقیق لەوێ نەبوون و تەنیا سەرۆكی هەیئە لەوێ بوو، سەرۆكی هەیئەی تەحقیقی كەركوك لەو سەردەمە یەك لەوانەبوو كە سەدام دواتر لەگەڵ محەمەد عایش و جەماعەتەكەی لەبەغدا لەسێدارەی دا، هەموو ئەوانەی لە سەرەوە باسم كرد، بەیەك سەیارەیان بردین و هەمووشمان كۆمەڵە و هەموومانیان لەیەك خانوو كردین، كە گەیشتینە ژوورەكە، جاری یەكەم وامانزانی ئەوێندەر شێتخانەیە، چونكە كە چووینە ژوورێ، ژوورەكی بچووك دەبینی و هەندێک بە ڕووتی و هەندێک بە شۆرت، لەوانە نیوەی دانیشتیە و نیوەی راوەستایە، چونكە جێگای هەموویان بە دانیشتن نابێتەوە، لە دیوارەكان بزماری گەلێك زۆر لێدرابوو، هەركەسە و كراس و جل و بەرگی خۆی بە بزمارێك هەڵواسیبوو.
د. مەغدید سەپان، كۆسرەت رەسوڵ، ل ( 112 و 113) .
جامانەی سوور
لەنێو هەموو خیڵەكاندا، تەنها بارزانییەكان جامانەی سوور دەبەستن، ئەم مەسەلەیە پێشینەی خۆی هەیە و پەیوەندیی بە ریشەی بیروباوەڕی بارزانییەكانەوە هەیە، لەم رووەوە بۆچوونێك هەیە پەیوەندییەك لەنێوان رەنگی سوور وەك دروشمی بارزانییەكان و لەنێوان كۆمۆنیزم دا بەدی دەكا، بەڵام ئەم پەیوەندییە بە هیچ شێوەیەك راست نییە، تەنانەت لەنێو بارزانییەكانیشدا و بەتایبەتی لەنێو گەنجەكانیاندا، هەندێ وای بۆ دەچن كە دەركەوتنی جامانەی سوور دەچێتەوە سەر رۆژگاری گەڕانەوەیان لە روسیاوە لە ساڵی 1958دا، بەڵام ئەم بۆچوونە زادەی نەزانینە زیاتر لەوەی كە زادەی كۆشش بێ بۆ سەلماندنی كاریگەریی كۆمۆنیزم لەسەر بارزانییەكان و هیچ بنەمایەكی بەهێزیشی نییە، چونكە جامانەی سوور بەرلەوەی بارزانییەكان لە ساڵی 1947 پەنا بۆ روسیا بەرن، دروشمی بارزانییەكان بووە، بۆیە چەوتیی بوونی پەیوەندییەك لەنێوان دروشمی بارزانییەكان و دروشمی كۆمۆنیزم پێویستی بە بەڵگەهێنانەوە نییە.
فەرید ئەسەسەرد، ریشەی بیروباوەڕی بارزانییەكان، ل (195).
رێپێوان لە دژی رژێمی عیراق
هەر لە ساڵی 1976دا مام جەلال و عادل موراد هاتن و كۆبوونەوەیان لەگەڵ ئەوانەماندا كرد كە یەكێتی بووین، پاشانیش لەگەڵ كوردەكانی ئەوێ لەسەر بەرنامە و سیاسەتی یەكێتی و دۆخی كوردستان قسەیان بۆ كردین، ئەو ماوەیەی لەوێ بووین، چەندین رێپێوانمان دژی رژێمی عیراق كرد، بەتایبەتیش كە كاك شەهاب و هاوڕێكانیان لە سێدارە دران، هەموو كوردەكان لە مەیدانی دام كە جێگەیەكی بەناوبانگە لە ئەمستردام و لەبەردەم تەلاری مەلیكەی هۆڵەندایە، چەندین وێنە و دروشممان دژی رژێمی دیكتاتۆری بەغدا بەرزكردەوە، لەو ماوەیەدا لەگەڵ هاوڕێكانمدا لە كاركردن بەردەوام بووم و هەر لەو ماوەیەشدا بوو محەمەد سابیر هاتە دەرەوە و چەند شەوێك لامان مایەوە و ئیتر نەگەڕایەوە بۆ عیراق، بە ئیفاد هاتبوو.
مستەفا چاوڕەش، یادەوەرییەكان، ل (128).
