ئاری مەحمود قەرەداغی/ سویسرا
دوای کەمبوونەوەی گەشەسەندنی ساڵی پێشوو، ئابووریی یەکێتیی ئەوروپا ساڵی 2024 لاوازتر لەوەی پێشبینی دەکرا دەستیپێکرد. پێشبینی زستانەی کۆمسیۆنی ئەوروپا، گەشەسەندنی هەردوو یەکێتیی ئەوروپا و ناوچەی یۆرۆ بۆ ساڵی 2023 نزیکەی 1.2 % بۆ یەکێتیی ئەوروپا و لە ناوچەی یۆرۆش 1.7 %. بۆ ساڵی 2025، کۆمیسیۆن بەردەوامە لە پێشبینیکردنی رێژەی گەشەکردن %1.7 لە یەکێتیی ئەوروپا و پێشبینیش دەکات لە ساڵی 2024دا گەشەکردن بۆ ئەڵمانیا 0.3 %بێت.
ساڵێکی ئاڵۆز
پائۆلۆ جێنتیلۆنی کۆمیساری ئابووری وتی: ئابووریی ئەوروپا ساڵێکی زۆر قورسی بەسەر بردووە. زۆرێک لە رووداوەکانی هاوکات بە شێوەیەکی بەرچاو خۆڕاگریمان تاقیکردۆتەوە. پێدەچێت ئەو بوژانەوەیەی پێشبینی دەکرێت لە ساڵی 2024دا کەمتر بێت لەوەی چاوەڕوان دەکرا، سێ مانگ لەمەوبەر وردە وردە لە نێوان خاوبوونەوەی بەرزیی نرخەکان و گەشەی ڕاستەقینەی مووچە و بازاڕێکی بەهێزی کاردا گوڕ و تینی زیاتری بەدەستهێنا. لەگەڵ باشتربوونی بارودۆخی قەرز و بەردەوامبوونی رۆیشتنی پارە لە دامەزراوەی بوژانەوە و خۆڕاگری، چاوەڕوان دەکرێت ئاستی وەبەرهێنان بە بەردەوامی بمێنێتەوە. پێشبینی دەکرێت لە ساڵی 2025دا گەشەکردن پتەوتر بێت و رێژەی هەڵاوسان لە ئامانجی بانکی ناوەندی ئەوروپا نزیک بێتەوە کە 2 % بوو. بەڵام گرژییە جیۆپۆلەتیکییەکان و کەشوهەوای ناسەقامگیری زیاتر و زۆرێک لە هەڵبژاردنە گرنگەکان لە هەموو بەشەکانی جیهان، پێشبینییەکان قورس دەکەن.
ئەڵمانیا و ئەوروپا
کۆمسیۆن پێشبینی دەکات لە ساڵی 2024دا گەشەی ئابووری ئەڵمانیا نزیکەی 0.3 % بێت هەروەها بۆ ساڵی 2025 بە رێژەی 1.2 % بێت. هەڵاوسان لە ئەڵمانیا لە ساڵی 2024 بۆ 2.8 % دادەبەزێت و لە ساڵی 2025 بۆ 2.4 % دادەبەزێت.
لە ساڵی 2023دا گەشەکردن بەهۆی وەرینی هێزی کڕینی ماڵان و توندکردنەوەی بەرچاوی دراوی و کشانەوەی بەشەکی لە رێوشوێنەکانی پشتیوانی دارایی و دابەزینی خواستی دەرەکی راگیرا. دوای ئەوەی لە نیوەی دووەمی ساڵی 2023دا بە لاوازییەوە لە پاشەکشەی تەکنیکی دوورکەوتەوە، ئاسۆی ئابووریی یەکێتی ئەوروپا لە چارەکی یەکەمی ساڵی 2024دا بە ناڕوونی ماوەتەوە و تەم دایگرتووە.
پێشبینی دەکرێت دوای ساڵێکی لاواز، ئاڵوگۆڕی بازرگانیی دەرەکی بگەڕێتەوە باری ئاسایی خۆی
گەڕانەوە بۆ باری ئاسایی
بەڵام پێشبینی دەکرێت لەگەڵ پێشکەوتنی ساڵدا چالاکییە ئابوورییەکان وردە وردە خێراتر بن. لەگەڵ بەردەوامبوونی کەمبوونەوەی هەڵاوسان، گەشەی راستەقینەی مووچە و بازاڕێکی بەهێزی کار دەبێت بەشداربێت لە بوژانەوەی بەکاربردن. سەرەڕای لاوازبوونی رێژەی قازانج، چاوەڕوان دەکرێت وەبەرهێنەکان سوودمەندبن لە سووککردنی وردە وردەی مەرجەکانی قەرز و بەردەوامبوونی بەکارهێنانی ئاسانکاری بوژانەوە و خۆڕاگری. جگە لەوەش پێشبینی دەکرێت دوای ساڵێکی لاواز، ئاڵوگۆڕی بازرگانی دەرەکی بگەڕێتەوە باری ئاسایی خۆی. پێشبینی دەکرێت خێرایی گەشەکردن لە نیوەی دووەمی ساڵی 2024 تا کۆتایی ساڵی 2025 سەقامگیر بێت.
دابەزینی هەڵاوسان
هەڵاوسانی سەرەکی لە ساڵی 2023 دا خێراتر لەوەی پێشبینی دەکرا دابەزی، ئەمەش بە شێوەیەکی بەرچاو بەهۆی دابەزینی نرخی وزەوە. بەهۆی کەمبوونەوەی چالاکییە ئابوورییەکان، هێوربوونەوەی بەرزیی نرخەکان لە نیوەی دووەمی ساڵدا بۆ کاڵا و خزمەتگوزارییەکانی دیکەش بەرچاو بوو.
رێژەی هەڵاوسان کە لە چەند مانگی رابردوودا لە چاوەڕوانییەکان کەمتر بووە و دابەزینی نرخی کەرەستەی خاو و لاوازبوونی ئابووری، هەڵاوسانی خستۆتە سەر رێڕەوێکی بەرزتر بەرەو دابەزین لەوەی کە لە پێشبینییەکانی پاییزدا گریمانە دەکرێت. بەڵام لە کورتخایەندا، بەسەرچوونی رێوشوێنی فریاگوزاری وزە لە زۆرێک لە وڵاتانی ئەندام و بەرزبوونەوەی تێچووی گواستنەوە لە ئەنجامی پچڕانی بازرگانی لە دەریای سووردا، پێدەچێت ببێتە هۆی هەندێک فشاری نرخ، بەبێ ئەوەی ببێتە هۆی ئەوەی هەڵاوسان لە رێڕەوی دابەزینی خۆی لابدات. لە کۆتایی ماوەی پێشبینییەکەدا، پێشبینی دەکرێت هەڵاوسانی گشتی لە ناوچەی یۆرۆ کەمێک لە سەرووی ئامانجی بانکی ناوەندی ئەوروپا بێت، بەڵام هەڵاوسان لە یەکێتیی ئەوروپا بە گشتی کەمێک زیاتر بێت.
زیادبوونی نادڵنیایی بەهۆی گرژییە جیۆپۆلیتیکییەکانەوە
ئەم پێشبینییە بە لەبەرچاوگرتنی گرژییە جیۆپۆلیتیکییە بەردەوامەکان و مەترسی پەرەسەندنی زیاتری ململانێکان لە خۆرهەڵاتی ناوەڕاستدا، نادڵنیایی هەیە. پێشبینی دەکرێت زیادبوونی تێچووی گواستنەوەی بار کە لە ئەنجامی پچڕانی بازرگانی دەریایی لە دەریای سوورەوە دروست بووە، تەنیا کاریگەرییەکی کەمی لەسەر هەڵاوسان هەبێت. بەڵام لە ئەگەری پچڕانی زیاتردا، وەشانی نوێ بەردەستە
پێشبینییەکان
ساڵانە کۆمسیۆنی ئەوروپا دوو پێشبینی گشتگیر (بەهار و پایز) و دوو پێشبینی کاتی (زستان و هاوین) بڵاودەکاتەوە. پێشبینییە کاتییەکان پەیوەستن بە بەرهەمی ناوخۆیی ساڵانە و هەڵاوسانی لە چارەکی ساڵدا و دواتر بۆ هەموو وڵاتانی ئەندام، هەروەها کۆی گشتی یەکێتیی ئەوروپا و ناوچەی یۆرۆ.
سەرچاوەکان
https://germany.representation.ec.europa.eu/news
