هیڤی کاوە أزاد
ئایا كی رەوشەتی لدەف سنێلەیی پەیدا دكەت؟ پێنەڤێت خێزان پاشی جڤاك رۆلێ سەرەكی دگێرن و ئەو بەرپرسیارێن ئێكێ نە كو ژینگەهەكا گونجایی بۆ وی دروست بكەن
قوناغا سنێلەییا دەستپێکی، قوناغەكا هەستیارە دژیانا تاکەکەسیدا و دڤی دەمیدا چەندین تایبەتمەندیێت رەوشتی (أخلاقي)و دەروونی دروست دبن. لدوڤ خواندنا زانستێ دەروونی، د شیاندایە گرنگترین تایبەتمەندیێن رەوشتی یێن قوناغا سنێلەییا دەستپێکی (المراهقة المبکرة)، بشێوەیەکێ کورت نیشان بدەین و هەروەسا مە چەندین قوناغێن هەین کو سنێلە تێدا دەرباز دبيت، ژوان ژی قوناغا پێشڤەچوونا خودی و دڤێ قوناغێدا، سنێلە دەست ب دیڤچوونا خودیێ خوە دکت، کو ئەڤە ژی کارتێکرنێ لسەر بها و رەوشتان دکەت. ئەو هەولددەن پێناسا ئەوێ بکەن، کا ئەو کینە و باوەریێ ب چ دئینن و قوناغا ھزركرنا رەوشتی و گەشەكرنا رەوشەتی لدەف وی بۆ تێگەھشتنا چەمكان دروست دبیت، وەکی؛ دادپەروەری و ماف و بەرپرسیارەتیێ و سنێلە دكەڤیتە ژێر کارتێکرنا هەڤتەمەنێن خوە و خێزانێ و پێکولێ دکەن بگەهنە رازیبون و سەربەخوبونێ. ژلایێ هەڤسوزیێ ژیڤە، سنێلەی شیانێن هەڤسوزیێ لگەل کەسانێن دی پەرەپێددەت، ئەڤەژی تێگەهشتنا وان د رەوشتیدا بلند دکەت باوەریەكا زێدەتر بۆ وی دروست دبیت، چ ل قوتابخانێ یان چ ل مال، و ئەڤەژی هاریکارە بۆ هەستکرن ب بەرپرسیارەتییا رەوشتی.
ئەڤ تایبەتمەندیێن ل سەری مە بەحسكرین، بەشەکن ژ گەشەکرنا ئاسایی یا سنێلەی و هاریکاریا وان دکەت، داکو خوە دگەل ئاستەنگیێن جڤاکی بگونجینن و رەوشتی کارتێکرنەکا زور لسەر گەشەكرنا مێشكێ سنێلەیان هەیە و هاریکاریا وان دکەت، ددانا بریارێن دروستدا، دروستكرنا پەیوەندییان، چ ئەو پەیوەندیێن ھەنێ دگەل خێزانێ بن یان دەوروبەران دیسان باوەری بخوەبوونێ لدەف وان دروست دكەت و ئایا كی رەوشەتی لدەف سنێلەیی پەیدا دكەت؟ پێنەڤێت خێزان پاشی جڤاك رۆلێ سەرەكی دگێرن و ئەو بەرپرسیارێن ئێكێ نە كو ژینگەھەكا گونجایی بۆ وی دروست بكەن، وەك مە گوتی قوناغا سنێلەییێ قوناغەكا ھەستیارە و پێدڤییە ل سەر بنەمایێن رەوشتی و باوەری بخوەبوونێ بهێنە پەروەردەكرن و فێری بەرپرسیارەتێ ببن.
