(6)
نەوەکان لە پێشبینی و شێوازی مامەڵەکردنیان کاردا جیاوازن کە لە ئاکامدا ئەگەر بە باشی مامەڵەیان لەگەڵدا نەکرێت، ململانێکان گرژی، گرفت، بۆشایی و ئاستەنگەکان لە پەیوەندی و کاری بە کۆمەڵ لە نێوانیاندا دەخوڵقێنێت. ئەم جۆرە ململانێیە دیاردەیەکە لە ژینگەی کاردا لە نێوان نەوە جیاوازەکاندا روودەدات، بەهۆی جیاوازیی شێوازی بیرکردنەوە و کارکردنیان، بەهاکان، دیدوبۆچوون و تێڕوانینیان و پەیوەندیکردن و شێوازی رەفتار و هەڵسوکەوتیاندا.
دابینکردنی بەرنامەکانی راهێنان بۆ دڵنیابوون لەوەی هەموو نەوەکان دەتوانن بەشێوەیەکی کاریگەر ئامڕاز و تەکنیکی هاوچەرخ بەکاربهێنن
نەوەکان لە ژینگەی کاردا ئەم توێژانە دەگرێتەوە وەک نەوەی تەقلیدی(نەوەی بێدەنگ): ئەم نەوەیە بڕوایان بە بەها نەریتییەکانی کارکردن هەیە، وەک دڵسۆزی بۆ دامەزراوە، رێزگرتن لە پێکهاتە و رێکخراو و دیسپلین و بڕوایان وایە کە سەرکەوتن بە هەوڵی بەردەوام و کارکردنی درێژخایەن بەدەستدێت، ئەم نەوانە گرنگیدان بە هاوسەنگیی کار و ژیانی کەسێتی کەم دەکەنەوە.
نەوەی X: ئەم نەوەیە باوەڕی بە کاری سەخت هەیە، بەڵام هاوسەنگیی پەسەند دەکات لە نێوان کار و ژیانی کەسیدا و سەربەخۆیی لا پەسەندە.
نەوەیY: ئەم نەوەیە بە ئارەزووی گۆڕانکاریی کۆمەڵایەتی و تەکنۆلۆژیا ناسراوە، کارکردن بە ئامڕازێک دەزانن بۆ خۆناسین. ژینگەی کاری نەرم و گونجاویان پێ باشترە کە رێگەیان پێدەدات بەشداریی و داهێنان بکەن، زیاتر بایەخ دەدەن بەو ئەرکانەی حەزیان لێیە، نەک تەنها مووچە، ئارەزووی کارلێکردنی کۆمەڵایەتی و کاری هەرەوەزی دەکەن.
نەوەی Z: نەوەیەکە کە لە سەردەمی تەکنۆلۆژیا و پەیوەندیی دەستبەجێدا گەورە بووە. لایان ئامڕازی دیجیتاڵیی هاوچەرخ لە کاردا باشترە و بەدوای سەربەخۆیی و نەرمی و دەرفەتی فێربوون و گەشەپێدانی بەردەوامدا دەگەڕێن و دەیانەوێت لە ژینگەیەکدا کار بکەن کە هانی هەمەچەشنی و گشتگیریی بدات.
ململانێکان وێڕای ئەوەی دەتوانن لە ژینگەی کاردا ئاستەنگ دروست بکەن، بەڵام دەکرێت لەڕێی گرتنەبەری چەند شێوازێکەوە تێپەڕێنرێت لەوانە، تێگەیشتنی هاوبەش و پەیوەندیی کاریگەر و سوودوەرگرتن لە خاڵە بەهێزەکانی هەر نەوەیەک. خوڵقاندنی ژینگە بەمەبەستی هاندانی دیالۆگی نێوان نەوەکان و کارکردن بۆ تێگەیشتن لە پێداویستی و چاوەڕوانییەکانی هەر نەوەیەک. دابینکردنی بەرنامەکانی راهێنان بۆ دڵنیابوون لەوەی هەموو نەوەکان دەتوانن بەشێوەیەکی کاریگەر ئامڕاز و تەکنیکی هاوچەرخ بەکاربهێنن. سوودوەرگرتن لە جیاوازیی نەوەکان بۆ هاندانی هاوکاریی نێوان فرە نەوەکان، بۆ ئەوەی هەر نەوەیەک بتوانێت زانیاری و ئەزموونەکان هاوبەش بکات.
ململانێی نەوەکان دەتوانێت هاندەر یان کۆسپ بێت، بەڵام گرنگە لەو هۆکارانە تێبگەین کە یارمەتیدەرن بۆ ئەم ململانێیە و چۆنێتی مامەڵەکردنیان بە شێوازێکی بونیادنەر، بۆیە فرە نەوەیی دەتوانێت هێزێک بێت بۆ باشترکردنی ژینگەی کار و بەهێزکردنی بەرهەمهێنان و گەشەسەندن و ببێتە دەرفەتێک، کە هەر نەوەیەک بەهای تایبەت پێشکەش بکات، بە نموونە، نەوەی رابردوو بە ژیریی و ئەزموونی درێژخایەنیان لەبوارەکەیاندا دەتوانن یارمەتیدەر بن لە پاراستنی سەقامگیری دامەزراوەکان و پێشکەشکردنی تێڕوانینی ستراتیژی بۆ چۆنێتی مامەڵەکردن لەگەڵ قەیرانەکاندا، نەوەی ئێستاش، دەتوانن بە رۆحی داهێنان و تەکنۆلۆژیای هاوچەرخ بەشداریی بکەن.
[email protected]
