قسەیەك بۆ یادی رۆژنامەگەری كوردی

 بەو پێیەی سێ بەشی ژیانم لەنێو راگەیاندن و بێنەوبەردە و گێژاوی نێو میدیای كوردی بەسەر بردووەو تێكڕا نزیكەی 20 ساڵە لەم بوارەدا كار دەكەم، بە حەز و خواست و خۆزگەی خۆم لە تەمەنێكی لاوێتیەوە تێكەڵ بە بواری میدیا و كاری رۆژنامەوانی بووم، لەبەر ئەم ھۆكارە بە مافی خۆم دەزانم سەرنجێك لەسەر یاد و رەوشی رۆژنامەگەری كوردی بنووسم.
سەرەتا بەداخم بەم جۆرە دەنووسم، نیگەرانم بۆ ئەو رەوشە خراپەی رۆژنامەگەریی كوردی پێیدا گوزەر دەكات، ناتوانیت نیگەران نەبیت كاتێك دەبینیت پێگەی رۆژنامەگەری لە كوردستاندا، لە بازنەیەكی داخراوی تاڕادەیەك چەقبەستوودا دەسوڕێتەوە، پاش دەیان ساڵ  ھێشتا نەمانتوانیووە رێڕەوێكی كاریگەر و قبوڵكراو بدۆزینەوەو ھەنگاوی گەورە و بونیادنەر بنێین و میدیای كوردی بخەینە سەر شاڕێی میدیای سەنگین و خاوەن پێگەی راستەقینە. تا ئێستا نەمانتوانیووە ھەنگاوێك نزیك بكەینەوە لەو بەرەوپێشچوونەی كە میدیای نێودەوڵەتی ساڵانێكی زۆرە پێی گەیشتووە و لە زۆرینەی وڵاتانی پێشكەوتووی دونیا شەمەندەفەری دەسەڵاتی چوارەم تاڕادەیەکی زۆر بێ دووكەڵ رێدەكات، زۆربەمان «ئەوانەی بەرپرسیارانە لە بوارەكەدا كاردەكەین و جەرگمان بە میدیا دەسووتێت» ھەست بە كەلێن و كەموكورتییەكان دەكەین، بەڵام بەكاریگەری ئەو دۆخەی كە ساڵانێكە لەم ناوچەیەی خۆمان دەگوزەرێت، بە ھۆكاری ژینگەی نالەباری ململانێی سیاسی و كۆمەڵایەتی و لێكەوتەكانی جەنگ و كاولكاری و سڕینەوەی یەكتر، چاومان لە باشكردنی دۆخی میدیا تاڕادەیەکی زۆر نوقاندووە و كوێرانە لەگەڵ ئەو خواست و شەپۆلەدا رێدەكەین، كە بە پلان كار لەسەر ئەوە دەكات، میدیای كوردی لە ھەمان بازنەدا،  خول بخوات و دەرفەتی ئەوەی نەبێت رێڕەوی راستەقینەی خۆی بدۆزێتەوە.
لەكاتێكدا رۆژنامەنووسان لەسەر كەیسی ئاشكراكردن و گواستنەوەی زانیاری و راستییەكان بۆ خەڵك تیرۆر دەكرێن و بەشێكی تریان بە پاساوی بەزاندنی (ئازادیی رۆژنامەوانی) لە زیندان توند دەكرێن، رەنگە كاڵفامی بێت بەمزووانە ئومێد بە داهاتوویەكی پرشنگدار بۆ دۆخی میدیا لەم بەشەی كوردستان ببینیت، تەنانەت تروسكاییەكی ئەوتۆ بۆ بەرەوپێشچوونی بواری رۆژنامەوانی بەدی ناكرێت. لە دوای راپەڕین ئومێدێك هەبوو میدیا رۆڵی راستەقینەی خۆی ببینێت و چەند ھەنگاوێكی بچووك لە بازنەیەكی سنووردار و داخراودا نرا، بەڵام ھەر زوو ئەو ھەنگاوە كەوتە بەر ھەڕەشەی سیاسییە بەرژەوەندیخوازەكان و میدیایان كردە داردەست و دەستەمۆی خواستەكانیان و داپۆشینی عەیب و عارەكانیان، تەنانەت بەوەشەوە نەوەستان لە سەردەمی نوێی ژیری دەستكرد و میدیایی نوێ و نوێگەریدا، خۆیان بوونە خاوەنی میدیا و میدیایان بەتەواو خستە ژێر ركێفی خۆیان و دەستەمۆیان كرد. 
پاش 127 ساڵ لە  تەمەنی رۆژنامەگەری كوردی، جێگەی داخ و تێڕامانە، ژینگە و دۆخی  میدیا و رۆژنامەگەری لە كوردستاندا، لە ناوەڕۆك و گەیاندنی پەیام و بابەتیبووندا لەوپەڕی خراپیدایە كە دەكرا پێچەوانەكەی ببینبن، ناكرێت میدیاكاران لە نێوان دووڕیانی باشكردن و پەراوێزخستن، رێگەی دووەم ھەڵبژێرن بەڵكو دەكرێت ھەمووان بەوپەڕی بوێری و بەدەنگی بەرز، ئەم ژینگەیەی ئێستا رەتبكەینەوە كە میدیای كوردی پێیدا تێپەڕ دەبێت. راستە میدیای كوردی لە شێوە و شێوازدا خۆی گۆڕیەوە و بەرگێكی مۆدێرنی لەبەرکردووە، بەڵام ئەگەر بە چاویلكەی ئیتیك و پێوەری بنەما رۆژنامەوانییەكان لێی بڕوانیت، تێدەگەین كە لە ناوەڕۆكدا چەند دواكەوتووین، هەق وایە بۆ مێژوو بەرپرسیارییەتی ئەم قۆناغە هەڵبگرین و هەر یەكەو لە پێگە و رێگەی خۆیەوە رۆڵی گرنگی خۆی ببینێت لە راستكردنەوە و سەرپێ خستنی باری لاری رۆژنامەگەری كوردی و كەسانێك نوێنەرایەتی ئەم بوارە نەكەن كە لە بازنە و گۆماوی بەرژەوەندیی خۆیاندا مەلە دەكەن، بەرپرسیارێتی هەرە گەورەش دەكەوێتە ئەستۆی وەزارەتی رۆشنبیری و رێكخراوەكانی تایبەت بە بواری رۆژنامەوانی و  ئەكادیمستەكانی كوردستان. 
لەلایەكی تر كاتێك میدیا دەبێتە كەرەستەیەك بە دەستی بەشێك لە سیاسییەكان و كەسانی ئاست نزم و بێ مۆڕاڵ بۆ بەدیهێنانی ئامانج و كاری ناڕەوای تاقمێك كە جگە لە بەرژەوەندی و بازرگانی خۆیان، بیر لە بنەماكانی مرۆڤ بوون و ئازادیی رادەربڕین و سوودی گشتی ناكەنەوە،  ئەو دەمە كاری(میدیا) دەبێتە داپۆشین و میكیاژكردن بۆ ئامانجێكی دیاركراو، لەم دۆخەدا دەبێت ھەر چاوەڕێی ئەوە بكەین كەشتییە چارۆكەدارەكە رەشەبای رەشی رۆژگار، بیهێنێت و بیبات، نەك لۆژیك و  ئاكار و بنەماكانی كاری رۆژنامەوانی.  
بەشێك لەو سەرگەردانییەی كە میدیای كوردی تێیكەوتووە، دەگەڕێتەوە بۆ زۆر و بۆری میدیاكان و دابەشبوونیان بەسەر بەرژەوەندیی حزبی و كەسی و ئایدۆلۆژی جیاواز، هەریەكە و لەڕوانگەی بەرژەوەندی خۆی چەپۆكێك لە میدیا دەدات و  هێندەی دیكە سەركز و زەلیلی دەكات، ئەم ھۆكارانە وایكردووە راگەیاندنی كوردی  بەردەوام لە قەیرانێكی دروستكراودا بێت و بچێت، كارەساتە گەورەكەش لێرەدایە بەشێك لە میدیا بە پلان سەرقاڵی بنكۆڵكردنی ئەخلاق و دابونەریت و  كەلتوری كوردەوارییە و دەیانەوێت كۆمەڵگە لە رەگەوە لە هەموو بەها بەرزەكانی مرۆڤایەتی  و ئاكار و رەوشتی بەرزی دایبماڵن. 
لەنێو ئەم گێژاوەدا ئەگەر تروسكاییەك مابێت بۆ گەڕانەوەی پێگەی راستەقینەی رۆژنامەگەری، هاتنە دەنگ و دەست خستنە نێودەستی ئەو رۆژنامەنووس و خاوەن قەڵەمە راستگۆیانەیە، كە هێشتا بە ئاكارێكی بەرزەوە لە مەیدانەكەدان و دەجەنگن،  دەكرێت پێكەوە ئەوانەی قەڵەم و ویژدانی خۆیان نەفرۆشتووە، كارێك بكەین كەمێك نرخ و پێگە بۆ بوارەكە بگەڕێنینەوەو رێگە نەدەین لەمە زیاتر بوار و پیشەیەك كە لەسەر ئاستی دونیا پێگە و ناوبانگێكی كاریگەر و گەورەی هەیە، لە كوردستان بەم جۆرە یاری بە چارەنووسییەوە بكرێت .
هاوشێوەی زۆرێك لە بوار و لایەنەكانی دیكەی ژیان بواری رۆژنامەگەریش لە كورستان لە نێو  گێژاوێكی قوڵدایە و پێویستی بە باز و شۆڕشێكی رۆشنبیری و كەلتوری گەورە هەیە، هەركات گەیشتینە ئەو ئاست و قۆناغە، دەتوانین شانازی بە خۆمان و پیشەكەمانەوە بكەین، لە دڵەوە دەخوازم ئەو رۆژە بە چاوی خۆم ببینم.