عەبدولڕەحمان بامەڕنی
دهۆك هەژارترین پارێزگەهە ل سەر ئاستێ هەرێما كوردستانێ، رێژا بێكارییێ گەلەكە و داهاتێ خەلكی كەتییە سەر مووچەی و ئەگەر مووچە هات، لڤینەك دكەڤیتە بازاری و خەلك دشێت دروست هەناسەیا خوە ب هەلكێشیت و ژخوە ئەگەر مووچە گیرۆ بوو، خەلك دكەڤیتە لاڤە لاڤێ و بازار هەمی دراوەستیت.
ل دهۆكێ هەمی تشتەك پێكڤە گرێدایە و هەبوونا مووچەی نە بتنێ بارێ ل سەر ملێن فەرمانبەری سڤك دكەت، بەلكو خەلكێ دهۆكێ ب فەرمانبەر و بازرگان و كرێكار و دەستكار و پیشەكار و هەمی جوینێن كاری پێكڤە مفادار دبن، ژبەركو داهاتێ خەلكێ دهۆكێ رێژا هەرە بلندا وێ ب مووچەیڤە گرێدایە و چ داهاتەكێ دی نینە لڤینێ بێخیتە بازاری و هەر تشتێ دناڤا بازاریدا ژ دەرڤەی پارێزگەهێ بۆ دهێت و ئەڤە ژی ب رامانا، هەر چ پارێ دهێتە دناڤ پارێزگەهەكێ دا، دووبارە بۆ دەرڤەی پارێزگەهێ دەردكەڤیتەڤە و دهۆك خودانا خوە هیچ تشتەكێ بەرچاڤ نینە، كو پارێ وێ بۆ وێ بخوە بمینیت یان پارەی ژ دەرڤەی پارێزگەهێ بكێشیت!
ژ روویێ گەشتیاریێ ڤە كو دهۆكێ شیانێن راكێشانا گەشتیارا یا هەی، دهۆك یا ئارام نینە و رۆژانە فڕۆكێن توركیا دەڤەرێن جودا یێن هەرێمێ بۆمباران دكەن و خەلكێ سڤیل دبیتە قوربانی و بەرییا چەند رۆژان بوو ل گوندێ سپیندارێ، توپ ب بەر خانیەكی دكەڤیت و نە گەشتیار ب ئازادی دشێن قەستا جهێن گەشتیاری بكەن و نە ژی خەلكێ دەڤەرێ دشێن بچنە ناڤ رەزێن خوە و مفای ژ بەرۆبومێ بهارێ ببینن. ل سەر ئاستێ تاكی، چ پرۆژەیێن چاندنێ و وەبەرهێنانێ نینن، كو بەرهەمێ وێ ژ پێدڤیێن پارێزگەهێ زێدەبكەت و بهێتە هناردە كرن یان هەر چنەبیت پارێ دهێت ژی بۆ كڕینا وان تشتان ژ باژێڕی نەدەركەڤیت و ئەو پارێ دهێتە ناڤ دهۆكێ دا و یێ ژ دهۆكێ دەردكەڤیت، چ بەراوردیەك بۆ ناهێتەكرنێ.
ئەگەر دهۆكێ ب پارێزگەهێن دیێن هەرێمێ ژی بەراوردبكەین، بلا بگوتنا كاربدەستان بخوە بیت، پارێ پێدڤی بۆ دهۆكێ ناهێتە خەرجكرن و نە بتنێ ئەڤە، بەلكو ژ وێ بارا كێم ژی، پارێزگەهەكا وەكی هەولێرێ مفای ژێ وەردگریت و دێ هێشتا بێژین بۆچی دهۆكێ یا هەژارە؟
