نووسینگەی راگەیاندنی جێگری سەرۆکی یەکێتی
پاشنیوەڕۆی ئەمڕۆ لەبارەگای مەکتەبی سیاسی (ی.ن.ک) لەسلێمانی، هەڤاڵ (رفعەت عەبدوڵا) جێگری سەرۆکی یەکێتیی نیشتمانیی کوردستان لەگەڵ هەڤاڵ (زیاد جەبار) لێپرسراوی مەڵبەندی سلێمانی و هەڤاڵانی ئەنجومەنی مەڵبەندو لێپرسراوی کۆمیتەکان کۆبوەوە.
لەسەرەتای کۆبونەوەکە جێگری سەرۆکی یەکێتی ستایشی کار و چالاکییەکانی مەڵبەندی سلێمانی کرد و رۆڵی هەڤاڵانی مەڵبەندی لەجۆشدانەوەی رێکخستنەکان و خەباتی جەماوەری و پەیوەندی لەگەڵ هاووڵاتیاندا بەرز نرخاند.
هەڤاڵ رفعەت عەبدوڵا بایەخی مەڵبەندی سلێمانی و سەرجەم مەڵبەندەکانی بەگرنگییەوە باسکرد و وتی:"مەڵبەندی سلێمانی رووی گەشی پەیوەندی یەکێتییە لەگەڵ شارە حەیاتەکەو پێویستە هەمیشە دەرگای مەڵبەند کراوەبێت بەڕووی سلێمانی و خەڵکەکەیدا".
پاشان گفتوگۆی هەڤاڵانە کرا سەبارەت بە بەرنامەی رێکخستنەوەی ئۆرگانە جیاوازەکانی یەکێتی و نوێبونەوەی حزب و گونجان لەگەڵ دۆخی ئەمڕۆدا بەخۆڕێکخستنەوەو پێویستی گۆڕانکارییە ئۆرگانییەکان لە چوارچێوەی راپەڕاندی ئەرکە پەیڕەوییەکان لە ئێستاو داهاتوودا.
هەڤاڵ رفعەت عەبدوڵا ئاماژەی بەگرنگی و بایەخ و پێگەی سلێمانیدا لە روانگەو سیاسەتی یەکێتیدا کە مەڵبەندی کوردایەتی و پایتەختی رۆشنبیرییە لەتەواوی کوردستانداو لەوبارەیەوە وتی: "سلێمانی و یەکێتی دووانەیەکی گرێدراو و دانەبڕاون و وەک بیلبیلەی چاومان دەیپارێزین و ئەرکمانە خزمەتی زیاتری بکەین".
هەڤاڵ جێگری سەرۆکی یەکێتی ئاماژەی بۆ ئەوەکرد یەکێتی هەمیشە لەگەڵ گۆڕاو و پێدراوە نوێێەکانی سەردەمدا خۆی گونجاندوەو لەم رووەوە پێویستی ئەرکەکانی قۆناغی ئەمڕۆی بۆ هەڤاڵانی مەڵبەندی سلێمانی روونکردەوە کە مەڵبەندەکان تەنها مەڵبەندی رێکخستن نابن و بەشێوازی کلاسیک کاری حزبی و رێکخستن ناکەن، هەڤاڵ رفعەت وتی، "مەڵبەندەکان پانتایی هەموو جۆرەکانی خەبات دەبن و زیاتر ببنە رایەڵە لە نێوان یەکێتی و جەماوەردا" لەوبارەیەوە هەڤاڵانی راسپارد وەک هەمیشە لەناو جەماوەردابن و نەخشەڕێ و سیاسەتی یەکێتی روونبکەنەوەو بگەیەنرێتە هەموو خەڵکی سنوری مەڵبەندەکان.
هەڤاڵ جێگری سەرۆکی یەکێتی رایگەیاند، یەکێتی وەک حزب و بەپێگەی گەورە و کاریگەری لە حکومەتیش ئەرکیەتی بەخزمەتگوزاری و پرۆژەی گرنگ سلێمانی و گشت کوردستان خەڵات بکات.
وتیشی: "سلێمانی چاوەڕوانی زیاتری لێمان هەیەو نازی بەسەر یەکێتیەوە هەیە بۆیە دەبێت وەک هەمیشە مەڵبەندی سلێمانی، هێڵی گەرمی پەیوەندی سلێمانی و یەکێتی بێت".
هەڤاڵ رفعەت عەبدوڵا سەبارەت بەئامادەکارییەکان و خۆئامادەکردنی یەکێتی بۆ هەڵبژاردنەکانی داهاتووی ئەنجومەنی نوێنەرانی عیراق ئاماژەی بۆ ئەوەکرد لەمڕۆوە ئەرکی هەموو هەڤاڵانە بەمۆدێلی یەکێتیانەو بەگوڕوتینەوە رێکخستنەکان جۆش بدەنەوەو وتی: "لەناو جەماوەریشدا سەرخستنی لیستەکەی یەکێتی ئامانجی هەموان بێت".
لە کۆتایی کۆبونەوەکەدا هەڤاڵ جێگری سەرۆکی یەکێتی هیوای خواست مەڵبەندی سلێمانی لەجاران زیاتر پەرۆشی سلێمانی و خەڵکە تێکۆشەرەکەی و خەمخۆری شاربن. وتیشی:"خۆتان بەخزمەتکاری سلێمانی بزانن و وەک هەمیشە دەرگاتان کراوەبێت بۆ هەمووان بێ جیاوازی".
