خانەقی وەگ یەكیگ لەو شارەیل كوردستان كە لە یانزەی ئازار ئەرا چەن رۆژیگ ئازاد بیوو هەوای ئازادی باڵی وەسەر شاردا كیشا و تەموو مژی رەشی دكتاتوریی بەعسی راماڵی و، ئاسمانی شار پاك و ساف كریا و هەوا جوانەگەی ئازادی لە كویچە باغ تیكەڵ وە بوینی قەداح چیە ناو كویچە و كوڵانەگان شار بڵاو بیویە و وەگەرد ئەوەش كوڕانی یەكێتیی نیشتمانیی كوردستان و مەفرەزە ئازاگانی شار وەلیان بین و ئەو رووژیەلە هاژەی ئەڵوەنی رەنگ و زوڵاڵی ترگی بی، چما مەقام موسیقای ئەڵاوەیسی وەل ئازارەگان خودادای عەلی لە روحی مەردمەیەلمان دووبارە كوردایەتی زینگ كرد و یەبی لای خەڵك نازناوی هەوای ئازادی دریا ئەو چەن رووژەی خانەقی لەلایەن مەردم و پێشمەرگە كونتڕولكریا بی، هەرچەنیگ وەبی قوربانی و خوین وەخشین نەبیوو، چەندین میرخاس و خاسە كوڕی پیشمەرگە ئەرا ئازاد كردن و پارزگاری خاكەگەیان ئەرا ئەوەی خانەقی-یش وە ئازادی هاوشانی شارەكانی تری كوردستان بمیندو 111 كوڕە ئازای ئەی ناوچە لە سەنگەر بەرگری لە نیشتمان گیان پاك خوەیان وەخشی و چونە كاروانی نەمرەیلە و خوینی ئاڵیان تێكەڵ وە خاك شار بووین ناویان لە دەفتەری سەروەران توومار كریا و نازناو شەهید ریگای كوردایەتیان وەرگرد، وەلێ دوای چەن رووژ بەعس و دام و دەزگا پڕ لە تاوانی پەلامار خەڵك و شاریاندا و خانەقیان خەڵتانی خوین كرد.
بەعس دوای راپەڕینیش وەگشت جوورە سەركوتكێدنیگی خوەی وەسەر شاردا تاقی كردەوە، ئەرا ئەوەی ئەو چەن رووژەی لە ساڵی 1991 كە رووژیگ ئازاد بیوو لە دڵ و ناخ مەردم تاڵ و رەش بكەد دەسكردە رمانن جوانییەگان شارەگە و دووبارە دەسیدایە تەعریب و تەرحیل و تەبعیس و تاكو ساڵی 2003 خانەقی لەژیر چەپووك و زەبرو زەنگ رەشی بەعس بیوو.
دەستكەوت راپەرین ئەرا گەل كورد یەكجار گرنگە و وەرچەرخانیگی گەورە و مێژووی بیوو ئەرا ماف و داخوازییەگان گەلەگەمان مستەوگەر بكە گرنگ بیوو، یەبی بوینە خاوەنی هەریم و حكومەت و پەرلەمان و دامەزراوەو و شاریەل كوردستان زیاتر ئاوەدان كرایەو پرشكی راپەڕین ئەرا پارچەگانی تریش كاریگەری ئەرینی خوەی بی. و ئەرا خانەقی خوەمانیش ئەو بیە میژوویەگ و بەڵگەیگ ئەرا ئەوەی بتوانیمن وە دووس و ناحەز دوژمن یە بیشیمن خانەقی بەشیگی دانەبڕیاگە لە خاك كوردستان و مەردمی لە گشت وەخت و بوونەی هاوهەڵویست و یەك دەنگن و لە راپەرینی سەرتاسەریش بەشدارین وەل ناوچەگان ترەك و یەش بەڵگەی حاشاهەڵنەگرە ئەرایان كە كوردستانین.
ئەرایەش سەرخستن و بە دەسهاتن مافە رەواگانیان لە ئیسەو بە پشتگیرن ئەرا گەل و حزبیان و باوەش كردنسەو یەكدەنگن وەل یەكێتی و چاوەڕی دەس حەكیمانەی سەروك بافڵ تاڵەبانین تا مافەگانیان وەهیمەتی وەدەسباریمن و لیرەش بایەد بویشیمن خەون گشت گەرمەسیر و خانەقینیگە كە ئازادی باڵی بكیشدە گشت لایەگ و وەك هەریم كوردستان پارچەكانی تری كوردستان، رزگار بونیان بووگ لە زوڵم و ستەم، كورد باوان كوردە و چەو و دیدەیلمان وە سەركەوتن و ئازاد بیوون پارچەكانی تری كوردستان روشنەو بووگ و ئومیدواریمن وەی زوویە یە بادە دی.
