37 ساڵ لەمەوبەر كوردستان رووبەڕووی دڕندانەترین
تاوانی ئەنفال بووەوە، كە ئامانج لێی جینۆسایدكردنی گەلەكەمان بوو لەسەر زێدی باو
و باپیرانی خۆی.
ئەم تاوانەی كە بەرامبەر بە خەڵكی بێدیفاعی
گوند و دێهاتی كوردستان كرا، ئازارێكە بێكۆتایە لە دڵ و دەروونی هەمواندا و لەبیرچوونەوەی؛
هەرگیز ئاسان نییە، كە لە چەند مانگێكی كەمدا 182 هەزار مرۆڤی كورد لە پیر و گەنج
و منداڵ لە هەردوو رەگەز بە دڕندانەترین شێوە زیندەبەچاڵ كران و دەیان هەزاری تریش
رووبەڕووی ژیانی كوللەمەرگیی ناو ئۆردوگا زۆرەملێكان، كرانەوە.
لەم یادە پڕ لەسوێیەدا جارێكی تر تەئكیددەكەینەوە
ئەركی هەموانە لە هەرێمی كوردستان و عیراقیش هەوڵەكانمان چڕتربكەینەوە بۆ پێشكەشكردنی
خزمەتگوزاریی بەو ناوچانەی بەهۆی تاوانی ئەنفالەوە زۆرترین زیانیان پێگەیشتووە و هەروەها
ژیانێكی سەربەرزانە بۆ كەسوكاری شەهیدان و بێسەروشوێنبووەكانی جینۆسایدی میللەتەكەمان
دابینبكەین. لەلایەكی ترەوە بەرپرسیارێتیی پەرلەمان و حكومەتی فیدراڵیشە ئەركە مرۆیی
و دەستوورییەكانی خۆیان باشتر جێبەجێبكەن بۆ ساڕێژبوونی یەكجارەكیی زامەكانی
قوربانییانی تاوانی جینۆسایدی ئەنفال.
درود بۆ شەهیدانی ئەنفال و سڵاو بۆ خۆڕاگریی
كەسوكار و یادگاری شیرینیان.
مەكتەبی سیاسیی
یەكێتیی نیشتمانیی كوردستان
