حەیدەر مەنتك
خانەوادەی مام قادر سوێری لە هەولێر، یەكێكە لەو خانەوادانەی لە كۆڕی خەبات و پێشمەرگایەتیدا هەمیشە لە ریزی پێشەوەدا بوون و قوربانیی زۆریشیان داوە. كوڕەكانی ئەو خانەوادەیە (دكتۆر وەلی و شەهید وریا قوت)، دوو تێكۆشەری دەستەبژێر و كادری پێشكەوتوو، رۆشنبیر و دڵسۆز، بە ئەمەك و راستگۆی كوردایەتی بوون.
زۆر زوو چوونە كۆڕی تێكۆشانەوە و زۆریش ماندبوو بوون، لەگەڵ ئەوەشدا سادە و ساكار بوون و هیچكات نازیان بەسەر هاوڕێ و هاوسەنگەر و حزبەكەیاندا نەدەكرد و خۆیان بەسەر خەڵكی دیكەدا رانەدەدا و داوای دەستكەوتی تایبەتیان نەدەكرد.
ساڵی 1983 دكتۆر وەلی لە شەڕدا بە برینداری دەستگیركرا، مام قادری باوكی پارەیەكی خەیاڵیی خەرج كرد تا كوڕەكەی ئازاد بكات، بەڵام هەر ئازاد نەكرا و ترسی مەرگ و سێدارەشی لەسەر بوو، بەڵام لە گفتوگۆی ساڵی 1984ی نێوان شۆڕش و حكومەتی ئەوسای عیراق، بە گۆڕینەوەی دیل بە دیل، ئازادكرا.
دكتۆر وەلیی كۆچكردوو، لە شاخ رۆڵ و پێگەیەكی دیاری هەبوو، هەمیشە هاوكار و پشتیوانی هەڤاڵەكانی بوو بە تایبەت لە بواری پزیشكیدا، ساڵانی دواتر و هەمیشەش درێخی نەكرد لە تێكۆشاندا، تا كۆچی دواییەكەشی لە رۆژی 14/2/2019، هەر خەمخۆر و دڵسۆزی گشتی بوو.
ژیاننامەكەی
تێكۆشەری نەمر، وەلی قادر سەعدی حەمید ناسراو بە دكتۆر وەلی، لە دایكبووی ساڵی 1960ی گوندی (سوێری)ی پارێزگای هەولێرە.
لە رووی خوێندنەوە، خاوەنی بڕوانامەی دبلۆمە لە شیكاری نەخۆشییەكاندا.
ساڵی 1979 پەیوەندیی كردووە بە رێكخستنەكانی كۆمەڵەی رەنجدەرانی كوردستانەوە، ساڵی 1982 بووە بە پێشمەرگە لە كەرتی رێكخستنی شەقڵاوە، ساڵی 1983 لە شەڕێكدا دژی جاش، بە برینداری كەوتە بەردەستیان و رادەستی رژێم كرا، دواتر لە گفتوگۆی ساڵی 1984 ئازادكرا و دوای ئەوەش درێژەی بە پێشمەرگایەتی دا.
لە ژیانی پێشمەرگایەتیدا، جگە لە بەشداریی لە شەڕ و نەبەردییەكاندا، لە بواری تەندروستیدا رۆڵێكی ئێجگار گەورەی گێڕاوە لەناو هێزی پێشمەرگە و جەماوەردا، هەر لە پێشمەرگایەتیدا برایەكی بە ناوی (وریا قوت) شەهیدكراوە.
بەشداریی راپەڕینی ساڵی 1991ی كردووە و دواتریش لە كاری رێكخراوەیی و ئۆرگانەكانی حزبدا، وەك كادرێكی كارا و دڵسۆز و بە ئەزمون، خزمەتی كردووە.
بەداخەوە، رۆژی 14/2/2019 كۆچی دوایی كرد.
