دیڤچوون: بامەرنی
دگەل راگەهاندنا ئەنجامێن ئەزموونێن قوتابیێن ئامادەی، دەنگێن نەرازی ل دھوكێ پەیدا دبن و داكەفتنا ئاستێ خوێندكاری ل پارێزگەها دھوكێ دكەڤیتە بەر گومانێ. هەنە دبێژن، خوێندكار گرنگیێ ب خواندنێ نادەت و هەنە ژی دبێژن ماموستا تەركیزا خوە دئێختە سەر وانێن تایبەت و گرنگیێ ب وانەگوتنا ل ناڤ پولێ نادەت و دەنگەك ژی دبێژێت، مە گومانا هەی كو ل پارێزگەھێن دی ب رەنگەكی و دوویان هاریكاریا خوێندكاران دھێتە كرنێ، ژبۆ كو سەركەفتیێن ئێكێ ژ پارێزگەھێن وان بن.
چالاكڤانەك دبێژیت: «جارێ ل دەستپێکێ پیرۆزە ل ئێکەم و دوەمێن 12ێ، بەلێ هندی من دڤێت خوە قانع بکەم، کو ئەڤا هەرسال دئێتە دیتن کو سلێمانی ئێکەم و دووەمە و ب کەد و زەحمەتا خوە ڤان پلەیان ب دەست خوە ڤە دئینن، ئەز قەت قانع نابم». مەھدی حەسەن كو ئێك ژ چالاكڤانێن تورێن كومەلایەتیێ بەرنیاسە ل دھوكێ و د هەمان دەمدا ماموستایە ژی، ب نموونەكێ بەحسا ڤێ جوداھیێ دكەت و دبێژیت: «بۆ ماوەیەکێ ئەم چوونە ناڤ برایێن سۆران، مە ل وێرێ کار کر، سەرپەرشتێن وان، گەلەک جودا ژ یێن مە بەهدینا، بەس هژمارا مەترێن پاقژ زێدە ببا، قەت ئاریشە نەبوو تە چەند غش و سەرپێچی کربا، یا گرنگ ل دەڤ وان بەرهەم هەبت، مەتر هەبن ب چو ڕێک بت ئاریشە نینە!!».
ماموستایەك كو ئەڤە زێدەترە ژ 20 سالان ماموستایە و نوكە رێڤەبەرێ قوتابخانا دەلیڤە ل سێمێلێ گوت: «سالا پار ژی هەمان كێشە و هەمان گازندە دهاتنەكرنێ و لێ بۆ كەسێ خەم نینە دیڤچوونێ ژبۆ بابەتی بكەت و لیژنەیێن تایبەت بهێنە دروستكرن و ل سەر خالێن لاواز راوەستن». وەلید سلێڤانەیی سەبارەت ھوكاران گوت: «گەلەك هوكار هەنە، ژوان دەما رێڤەبەرێ قوتابخانێ ل سەر بنەمایێن زانستی نەهێتە دانان، هینگێ ئەو رێڤەبەر خوە ماندی ناكەت و ئەڤە ژبلی ماموستایێن وانەبێژ كو چ ژ ماف و چارەنڤیسێ خوە نزانن و ناكەڤنە بن چ فشارەكێ و هەر گاڤا ڤیان دشێن خوە ڤەكێشن و كێمیا ماموستایێن شارەزا و پسپور د بوارێ خوەدا، دگەلدا ژی ئاستێ رەوشەنبیری یێ دەیبابان گەلەك یێ گرنگە و دڤێت ئەو دیڤچوونا زارۆكێن خوە بكەن و دگەل ب راوەستن و حەزكرنا خوێندكاران بەراورد ب حەزێن وان یێن چاڤلێكرنێ و مودێلان و دیسان كێشا زاراڤی دناڤبەرا سورانیێ و بادینیێ دا بخوە ژی ھوكارەكە و ئەڤە هەمی ل ئالیەكی و دڤێت ئەم دانپێدانەكێ بكەین، كو رەوشەنبیریا وی ئالی ژ رەوشەنبیریا مە بەرفرەھترە و ئەڤێ ژی ئەگەرێن خوە یێن هەین. سەبارەت پەیوەندییا ماموستایان و لدویڤ دیڤچوونێن مە، ماموستایێن سلێمانیێ چەندین رێكارێن دی دگرنە بەر، وەك دروستكرنا گروپێن ڤایبەری و یوتیوبی و ماسنجەری و گەلەك ژ ماموستایان برێكا یوتیوبی وانەیێ بۆ قوتابیان فرێدەن و ئەز تەئكید دكەمەڤە، ئەگەر مە بڤێت ئاستێ خویندكارێ مە ژی یێ بلند بیت، دڤێت پەروەردە دگەل سازیێن پەیوەنیدار ل سەر ڤان ھوكاران راوەستیت و رێكێن چارەسەریێ بۆ پەیدا بكەت».
