دیدار: جەگەر كەمال رێكانی
نڤیسەرێ نیڤا ژیێ خوە زێدەتر دناڤ پەرتووكاندا دەربازكری، ب ناڤێ (ئەحمەد عەبدوللا زەرۆ) مێهڤانێ كوردستانی نوێی بادینانە. ئێك ژ دامەزرێنەرێن ئێكەتا نیسەرێن كوردە تایێ دهۆكێ، چەندین پەرتووكێن چاپكری هەنە و چەند ژی ئامادەنە بۆ چاپێ. ل سالا 1978ێ پەرتووكخانەیەكێ ب ناڤێ (دهۆك) ڤەدكەت و ب كەڤنترین پەرتووكخانە ل دهۆكێ دهێتە ناسكرنێ و د چاڤپێكەفتنەكێدا بەحسا پەرتووكێ دكەت، گرنگییا پەرتووكێ و تایبەتی ژی بەحسا پەرتووكا وەرگێڕایی دكەت، دا ژنزیك بزانین سەربورا وی دگەل نڤیسینێ و ھندەكێ دانوستاندنێ ل سەر پرۆسا وەرگێرانێ دگەل بكەین.
كوردستانی نوێی بادینان: سالا چەندێ بۆ تو چوویە دناڤ بیاڤێ نڤیسانێ دا؟
ئەحمەد عەبدولڵاه زەرۆ: ل بیاڤێ نڤیسانێ دا، هێشتا ئەز ل سالا چارێ یا زانكۆیێ بووم ل سالا (1967-1968). وی دەمی من هندەك تشت د نڤیسین، بەلێ مە بەلاڤنەدكرن و دەمێ ئەز ژ زانكۆیێ ب دووماهیك هاتیم، من بۆچوونەك هەبوو، ئەو ژی ئەز بهێمە كوردستانێ و گەنجان ببینم و وانە و پەیڤان نیشابدەم، بەرێ وان بدەمە كۆمكرنا فولكلوری و هەتا نۆكە ژی ئەزێ سەربلندم، كو ئەو تشتێ من دڤیا گەلەك ژ وێ بجھـ هات. سەبارەت ئێكەم بەرهەمێ من یێ چاپكری (شاهی و دیلان) بوو و ل سالا 1978ێ من چاپكربوو. دەربارەی دەسپێكرنا من بۆ نڤیسانا هەلبەستێ دزڤریتەڤە بۆ سالا (1969)ێ، كو من و فەیسەل مستەفای هەلبەست دنڤسین، بەلێ من نەبەلاڤدكرن و ئەو بوو، ل سالا 1973ێ ژنۆی من ل گۆڤارا (هیڤی)دا بەلاڤكرن.
كوردستانی نوێی بادینان: ئێكەم بزاڤا هەوە یا رۆژنامەگەری، كەنگی بوو؟
ئەحمەد عەبدولڵا زەرۆ: ئێكەم بزاڤا من یا رۆژنامەگەری، ل سالا 1973ێ بوو دەمێ من گۆڤارا (هیڤی) ل دهۆكێ دەرێخستی و حەفت هەژمار ژێ چاپ ببوون، پشتی هنگی ئەز چووم و بومە پێشمەرگە و قوناغا من یا پێشمەرگەیاتییێ ل سەرسنكێ بوو. ل وی دەمی من هندەك شیعرێن خۆ ژی دگەل خۆ بربوون، ڤێجا من رۆژەكێ ھونەرمەند (محەممەد تەیب تاهر) ئەوێ سترانبێژ دیت، ئینا وی پرسیار ژمن كر كا تە چ شیعر نینە بۆ من كو بكەمە ستران، من ژی گۆتێ من دو شیعرێن ئامادە یێن هەین و ئێك ژ وان من ئاوازا وێ ژی بۆ دانایە، ڤێجا من ئەو شیعر ب ئاواز ڤە دایێ، كەیفا وی گەلەك هات و پشتی هنگی كربوو ستران ژی، ئەو شیعر ژی ئەڤەبوو، ئەوا دبێژیت: (شۆڕەشا من ژ مافێ خۆ را ئەزم یار) كو ل سالا 1974ێ كربوو ستران و رۆژێ چەندین جاران ل ئێزگەیێ شۆڕەشێ دهاتە پەخشكرن، هەتا (هەژار موكریانی) جارەكێ گۆتبوو (محەمەد تەیب)ی ئەڤ شیعرە بوتانی یە ئەرێ تە ژ كیڤە ئینایە؟، وی ژی گۆتبوویێ یا ئێكێ خەلكێ زاخۆیە. پشتی هنگی من ل گۆڤارا (دەنگێ پێشمەرگە)ی دا ژی دو شیعر بلاڤكرن و ئێك ژوان من ل سەر (لەیلا قاسم) ڤەهاندبوو و هەر دوو شیعر پێكڤە ل ئێك هەژمار دا هاتنە بەلاڤكرن. جارەكێ ژی من شیعرەكا خۆ یا سیاسی بۆ رۆژناما (برایەتی) فرێكر، وان ژی كرە د دەستێ هۆزانڤان (سەبری بوتانی)دا، لاپەرێ وی یێ دووماهیێ كو لاپەرەكێ ئازاد بوو و ئەو یێ ب كەیفا خۆ بۆ كا چ بەلاڤبكەت، ئەو شیعر ئیناخوارێ و بەگراوەندێ وێ ژی ب زەری چێكربوو، ئانكۆ شیعرا ئەحمەدێ زەرۆیە و بەگراوەند ژی یێ كرییە زەر، ڤێجا وەختێ بەلاڤەدبیت چەند دانەیەكان دبەت و دچیتە (مەجموعە علمی) ل بەغدا كو (عەزیز ئاكرەیی) ل وێرێ بوو و سەرۆكێ وێ بوو و گۆتبوو وی، ئەڤە دانەیەك بۆ هەوە و ئەز دێ بۆتە شیعرەكێ خوینم، سەبری بوتانی شیعرێ دخوینیت ئینا (عەزیز ئاكرەیی) ما و گۆتێ ما تو ژێ ناترسی دێ وی كەسی ل توپەكێ دەی، سەبری ژی گۆتێ هەكە تشتەك ل من كرن، بلا ل وی ژی بكەن.
كوردستانی نوێی بادینان: سالۆخەتێن وەرگێرێ سەركەفتی چنە؟
ئەحمەد عەبدولڵا زەرۆ: پێدڤییە شەهرەزایی ل هەر دوو زمان و رەوشت و تیتالێن هەردوو مللەتان دا هەبیت، چونكی ئەگەر تە شەهرەزایی تێدا نەبیت، دێ كەڤییە دگەلەك شاشیان دا، خۆزی ژ خێرا خودێ را، پشتی سالا 1991ێ وێڤە مە شیابا 500 پەرتووكان د هەمی بواران دا وەرگێرین، بەس وەرگێرانا دروست بیت، بۆچی؟ چونكی هەر مللەتەك پێدڤی ب وەرگێڕان و رەوشەنبیریا ڤێ جیهانێ یە د هەر بیاڤەكێ دا.
