سەربەست مەولود، سەرۆکی وردبینیکردنی ناوی فەرمانبەران بۆ پێدانی زەوی لە وەزارەتی شارەوانی و گەشتوگوزار رایگەیاندووە، لە لایەن ئەنجومەنی وەزیرانەوە فەرمانی پێدانی زەوی بۆ 38 هەزار کارمەندی وەزارەتی ناوخۆ و خانەنشینان دەرچووە و ناوەکانیان گەڕاوەتەوە بۆ وەزارەتەکەیان.
سەرۆکی لیژنەکە ئەوەشی خستووەتەڕوو، ئەوانەی ناویان هاتۆتەوە بۆ پێدانی زەوەییەکانیان 25 هەزاریان خانەنشینانن و 15 هەزاریان کارمەندی وەزارەتی ناوخۆن.
سەربەست مەولود، دەڵێت، تاوەکو ئێستا زیاتر لە 315 هەزار فەرمانبەر و کارمەند و خانەنشین فەرمانى پێدانى زەوییان بۆ دەرکراوە و نزیکەى 100هەزارى دیکە ماون، وردبینى لە ناوەکانیان دەکرێت و بەرزدەکرێنەوە بۆئەوەى فەرمانى پێدانى زەوییان بۆ دەربکرێت.
وتیشی، ئێستا کار لەسەر ئامادەکردنى لیستى ناوى زیاتر لە 10هەزار پێشمەرگە دەکەن بۆئەوەى لە کۆتایی ئەم هەفتەیە ناوەکانیان بەرزبکرێتەوە بۆ ئەنجوومەنى وەزیران و فەرمانى پێدانى زەوییان بۆ دەربکرێت.
