جووتیارانی سنووری قەزای شارەزوور گلەیی دەكەن كە هاوكاریی ناكرێن بۆ ئەوەی بەرهەمی جۆ زیادبكەن، بەڕێوەبەری كشتوكاڵی سنوورەكەش تەئكیددەكاتەوە كە بەشێكی زۆر كەمی جووتیاران جۆ دادەچێنن.
خەسرەو محەمەد جووتیاری نموونەیی، پێیوتین: جووتیاران لە سنووری شارەزوور لە ساڵانی رابردوودا بەشێكی زەوییەكانیان بە بەرهەمی جۆ دادەچاند، بەڵام ئێستا بەهۆی ئەوەی هیچ هاوكارییەك ناكرێن، زیاتر زەوییەكانیان بە گەنم دەچێنن، وتیشی: یەكێكی دیكە لە هۆكارەكانی كەمبوونەوەی بەرهەمی جۆ ئەوەیە ئاژەڵداریی وەك جاران نەماوە و ئێستا خەڵكی گوندەكان یان سەرقاڵی باخدارین، یان دامەزراون و وازیان لە بەخێوكردنی مەڕوماڵات هێناوە، ئەگەر هەشیان بێت ژمارەیەكی زۆر كەم مەڕ و بزن و ئاژەڵی گەورەیان هەیە و پێویستیان بە بڕێكی زۆر كەم جۆ و كا هەیە بۆ زستانی ئاژەڵەكانیان.
سەرچڵ جەباری خاوەن ئاژەڵیش، دەڵێت: جۆ و كای جۆ كەمبووەتەوە و لە بازاڕدا زۆر گران بووە، ئەوەش بارگرانیی زۆر لەسەر شانی ئاژەڵداران دروستدەكات و وادەكات واز لە ئاژەڵداری بهێنرێت، بۆیە دەبێت حكومەت چارەسەری بۆ ئەوە هەبێت.
وەرزێر نەجمەدین خاوەن نووسینگەی كشتوكاڵی، پێیڕاگەیاندین: بەهۆی زۆریی هاوردەكردنی جۆوە، بەرهەمی ناوخۆ سەرف نابێت و پارە ناكات، ئەوەش هۆكارێكی سەرەكییە كە جووتیارەكان زەوییەكانیان بە بەرهەمی دانەوێڵەی جۆ ناچێنن و نزیكە لەوەی بەتەواوی بەرهەم نەهێنرێت.
فەرەیدون قادر بەڕێوەبەری كشتوكاڵی شارەزووریش بە كوردستانی نوێ-ی راگەیاند: جووتیاران هیچ هاوكارییەك ناكرێن كاتێك بیانەوێت دانەوێڵەی جۆ بچێنن، وتیشی: كەمترین رووبەری زەوی بە جۆ دەچێنرێت لە سنووری قەزاكەدا، هێندە كەمە هیچ ئامارێكی لەسەر وەرناگیرێت.
شارەزوور، محەمەد عەبدولڕەحمان
