کاتێک دەڵێن فڵان رۆژ پشووی رەسمییە، ئەوەی خەڵکی ئەو وڵاتە نەبێت دەپرسێت بۆچی و بە چ بۆنەیەکەوە، ئیتر دەبێت بۆی باس بکرێت کە بۆ چییە؟ بەمەش روونکردنەوە لەسەر ئەو رووداوە دەدرێت کە بەهۆیەوە رۆژەکە کراوەتە پشوو.
دەبوو لە یەکەم دەستبەکاربوونی پەرلەمانی کوردستاندا، رۆژی کیمیابارانکردنی هەڵەبجە کە دەکاتە 16-3 و رۆژی 14-4 کە بەرۆژی ئەنفال دانراوە، بکرابانایەتە پشووی رەسمی، تا هەموو ساڵێک ئەو دوو رووداو و پرۆسە قێزەونەی دژ بە مرۆڤایەتی کە رژێمی بەعس بەسەر گەلی کوردیدا هێناوە، بخرێنە بەر باس و نەوەکانی ساڵ لێی تێبگەن و بزانن چی بەسەر باوباپیرانیاندا هاتووە؟
لەم سەردەمە پێشکەوتووەی تەکنۆلۆژیادا، واتا لە کۆتایی دەیەکانی سەدەی بیستەمدا، کوشتنی بە کۆمەڵ و زیندە بەچاڵکردنی تاکی کورد، بووە رووداوی مێژوویی کۆتایی سەدە، ئەویش بە دوو پرۆسەی دڕندانەی رژێمی بەعس بە سەرۆکایەتی سەدامی گۆڕبەگۆڕ، لە دەستپێکردنی ئەنفالەوە بۆ کیمیابارانکردنی هەڵەبجە و چەندین ناوچەی دیکەی کوردستان.
دەبوو لە یەکەم دەستبەکاربوونی پەرلەمانی کوردستاندا، رۆژی کیمیابارانکردنی هەڵەبجە کە دەکاتە 16-3 و رۆژی 14-4 کە بە رۆژی ئەنفال دانراوە، بکرابانایەتە پشووی رەسمی
کورد لە شۆڕشدا بوو، زۆرینەی خەڵکیشی لەگەڵ بوو، رژێمی بەعس بە دڕندانەترین شێوە هەوڵی دامرکاندنەوەی ئەو شۆڕشەی دەدا، بەڵام بەرەنگاریی بەهێزتر دەبوو، لەدوای ئەو دوو پرۆسەیەوە، هێزی پێشمەرگە(شۆڕش) لاواز بوو، پەرتەوازە بوون، پانتاییەکی کەمی خاکی هەرێمی کوردستانیان بەدەستەوە ما، زۆرینە ئاوارەی ئێران و وڵاتانی دیکە بوون، بەمەش توانرا دەنگی ناڵە و هاواری کورد بگەیەنرێتە جیهانی دەرەوە، بەڵام بەداخەوە پارێزەرانی میللەتانی ژێر دەست، بەپێی پێویست نەهاتنە سەر هێڵی داکۆکی و رێگرییکردن لەو کردەوە نامرۆڤانەیەی رژێمی بەعس، هەربۆیەش ئەو رژێمە بێترس و بەردەوام هەنگاوی لەو چەشنەی دەنا، کۆڕەویش زادەی ئەو بێدەنگییەی نێوەندە نێودەوڵەتییەکان بوو، تا دواتر شەرمەزار بوون و هاتنە دەنگ و زۆنی پاراستنی ئاسمانییان لەسەر هەرێم دروستکرد.
ئێستا ئێمەی کورد لەم بەشەی کوردستان کە لەناو عیراقی فیدراڵیدا هەرێمێکین و خۆمان بەڕێوە دەبەین، زۆر شت هەن کە لەدەسەڵاتی خۆماندایە و گرنگیی پێنادەین، سەرەتا گلەییمان لە رێکخراوە نێودەوڵەتییە مرۆڤدۆستەکان دەکرد، بەڵام ئێستا لە دەستی خۆماندایە و نایکەین.
چۆن دەبێت مردنی کەسایەتییەکی کورد بکرێتە رۆژی پشووی رەسمی، بەڵام تیاچوونی سەدان هەزار کەس لە یەک پرۆسەدا، رۆژێکی رەمزیی بۆ دانەنرێت؟ خۆ ئەمە لەدەستی دەرەکیدا نییە یان لای نەیارەکانمان نییە!.
پێویستە پەرلەمانی داهاتوو، گرنگیی بدات بەم باسە و هەردوو رۆژەکە بکرێنە پشووی رەسمی، لەبەر ئەوەنا کارمەندان لە ماڵەوە دابنیشن، بەڵکو بۆ ئەوەی ئەو رۆژە هەمیشە زیندوو رابگیرێت و تیایدا چالاکی و یادکردنەوەی ئەنفال و کیمیاباران بکرێتەوە، چیرۆکە ون بووەکان زیندوو بکرێنەوە، کۆڕ و شانۆ بگێڕدرێت و دەربڕی ئەو رۆژە سەختانە بن، دەبێت هاو شێوەی شینگێڕیی مانگی عاشورا، هەموو ساڵێک لەو دوو رۆژەدا دوژمنانی مرۆڤایەتی ریسوا بکرێن، هەڵگرانی بیری بەعس بە نەفرەت بکرێن تا هیچ کات روویان نەیەت باسی ئینتیمایان بۆ ئەو تاقمە نامرۆڤانە بکەن لە رابردوو و ئێستادا.
