پێویستە هەردوو حزب حکومەتی شەراکەت پێکبهێنن، حکومەتێک کە بتوانێ خزمەتی کۆمەڵانی خەڵک بکات و مافی حزبەکانی تریش پێشێل و فەرامۆش نەکات
هەرێمی کوردستان مێژووی پارتە سیاسییەکان لە هەرێم بەگوێرەی دامەزراندن و قەبارەیان، هەر لە ئامانجی دروستبوونیانەوە، دەناسرێن کە تێیاندا هەیە لەلایەن وڵاتانی دەوروبەرەوە بەکاردەهێنرێن لەژێر ناوی هاوپەیمانی و دۆستایەتیدا.
یەکێتیی نیشتمانیی کوردستان، تاکە لایەن و هێزی سیاسییە کە پەیوەندییەکانی لەشێوەی دۆستایەتی و هاوکاریی دوولایەنە بووە، نەک لە خزمەتی لایەنێک.
دوابەدوای هەرەسی ساڵی 1975 بۆشایییەکی سیاسی ترسناک پانتایی باشووری کوردستانی داپۆشی، بۆ پڕکردنەوەی ئەو بۆشاییە و گێڕانەوەی هیوا بۆ گەلی کورد، لەماوەیەکی کورتدا، یەکێتی وەکو زەرورەتێکی نیشتمانی دامەزرا و لەپێناوی مانەوە و بەدەستهێنانی مافەکانی کورد گەشەی کرد و کۆمەڵانی خەڵک لەدەوری کۆبوونەوە و چەندین دەستکەوتی مەزن و پڕبایەخی بەدەستهێنا.
ئەوەی لێرەدا پێویستە و شیاوی وتنە، لەگەڵ ئەوەی سیستمی فرەحزبی پەیڕەو دەکرێت بەهۆی هەڵکەوتەی جوگرافی و قەبارەی یەکێتی و پارتی، و سیستمی دوو حزبی لە هەرێم بۆتە دیفاکتۆ، ئێستا هەردوو پارتەکە لەوە حاڵی بوون کە ناتوانن یەکتری بسڕنەوە، حزبەکانی تر و کۆمەڵانی خەڵکی کوردستانیش لەو بڕوایەدان ئەم سیستمە لە هەرێم بۆتە ئەمری واقیع.
بەهۆکاری ئەوەی لەڕێگەی هەڵبژاردنەوە یەکێکیان دەنگی زیاتر دێنێت، ئەوکاتە پێویستە یەکێکیان دەوری ئۆپۆزسیۆن بگێڕێت، لەبەرئەوە کە حوکمڕانی لە هەرێم بە سیستماتیک نەکراوە و خاوەنی دەستووری پەسندکراوی خۆمان نین و دەسەڵاتەکان لێک جیانەکراونەتەوە، حاڵەتێک خۆی سەپاندووە پێویستە هەردوو حزب بە رێککەوتن حکومەتی شەراکەت پێکبهێنن، حکومەتێک کە بتوانێ خزمەتی کۆمەڵانی خەڵک بکات و مافی حزبەکانی تریش پێشێل و فەرامۆش نەکات، پێویستە حزبەکان دان بەم راستییەدا بنێن و پەسەندی بکەن، ئەگەر مەبەستیان کوردایەتییە، پێویستە واز لە وابەستەبوون بە سیاسەت و بەرنامەی دەرەکی بهێنن، لەبری ئەوە پەیڕەوی رێبازە راست و دروستەکە بکەن و بگەڕێنەوە باوەشی گەل و لەگەڵ لایەنە سیاسییەکان بکەونە گفتوگۆ و رێککەوتن و بە هەموو لایەک بتوانن هاوچەرخانە، ئیدارەی ململانێکان بدەن و هاوتەریب خزمەتگوزارییەکان بە کۆمەڵانی خەڵک بگەیەنن و رێگا نەدرێ قەوارەی هەرێم و مۆرکە دیموکراسییە راستەقینەکە لەدەستبدرێ کە ی.ن.ک لە هەموان زیاتر خۆی بە خاوەن و پارێزەری راستەقینە ناساندووە.
بەپێی ئەنجامی دوا هەڵبژاردنی پەرلەمانی هەرێم، هیچکام لەم دوو حزبە براوەیە، بەتەنها ناتوانێت حکومەت پێکبهێنێت.
دواجار دەبێت بگەڕێینەوە بۆ رێککەوتن بۆ پێکهێنانی حکومەت و مل بنێن بۆ ئەنجامی هەڵبژاردن و دۆخی واقعیی هەرێم کە بەسەر دوو جوگرافیای سیاسیی جیاوازدا دابەش بووە، عەقڵییەتی خۆسەپێنی سوودی نییە.
یەکێتی، خۆی بەخاوەن و پارێزەری دەستکەوتە مەزنەکان دەزانێ کە بەدیهاتوون و خاوەنی جەماوەری فراوان و کۆنکرێتی خۆیەتی کە هەرگیز بڕوایان بە یەکێتیی نیشتمانیی کوردستان لاواز نابێت و لەژێر هیچ گوشارێکدا لەخشتە نابرێت.
ئەوەی ئەمڕۆ جەماوەر و وڵاتمان داوامان لێدەکات تا ئەو رۆژەی گشت ئامانجەکانمان دێتەدی، ململانێی سیاسی هاوچەرخە کە بە ئاڕاستەی خزمەتکردنی هاووڵاتیان رەنگبداتەوە، نەفرەت لە دووبەرەکی بکەین و وابەستەبوون بە فەرمانی دوژمنان وەلابنرێت، رەوشی نالەباری خەڵکی هەرێم کە لە حاڵەتی ئەوپەڕی نیگەرانی و خراپیدایە لەبەرچاوبگیرێت، چونکە تا سەر خەڵک ئەو حاڵەتەی پێ قبووڵ ناکرێت و چۆک دانادا بەرامبەر ستەم و نادادیی بێسنوور.
