دلۆڤان هالۆ
هەمی کەس بهایەکێ مەزن ب مرۆڤی نا بەخشن و دەستدانا وی کەسی بۆ تە ب چ تشتان ناهێتە قەرەبووکرن و تو نەشێی دووبارە وی کەسی ب دەست خۆ ڤە بینی
ل دەمێ کو مرۆڤ بهایی د دەتە کەسەکێ، رامانا وێ ئەوە کو مرۆڤ ژ زەنگینیا بهادارییا خۆ بهایی ددەتە وی کەسی، نەکو وی کەسی بخۆ د بنیات دا ئەو بها یێ هەی یێ، کو مرۆڤ ددەتێ. لەوما دەرئەنجام دێ بینی ئەو کەسێ تە بها دایێ، دێ هزر کەت کو د بنیات دا وی ئەو بها یێ هەی، لەوما دێ خۆ ژ تە مەزنتر و ب بها تر بینیت، هەتا بەلکو بگەهیتە وی رادەیی ئێدی تە بێ بها ببینیت و ب تە رازی نەبیت.
لەوما ئەگەر تە بهایەکێ مەزن ب کەسەکی دا و وی تو بێ بها دیتی، ل سەر تە یا پێدڤییە تو جارەکا دی وی بهایی ژێ بستینی، و پاشان پشتی بوورینا دەمەکێ کورت دێ بۆ وی کەسی دیار بیت، کو ژ راستا ژی وی بخۆ د بنیات دا ئەو بها نەبوو یێ تە دایێ، ب تایبەت ژی ئەگەر ئێدی نەبینیت کەسەکێ وەکی تە بهایی بدەتێ.
ژبەر هندێ هەر کەسەکێ تەمەت قەبارێ کەسایەتیا وی بهایی بدەیێ، ئانکو ئەگەر بهایێ کەسەکێ پێنج هزار دینار بیت، شەش هزاران پێ نەدە، ئەگەر بهایێ کەسەکێ دەهـ هزار بن، یازدە هزاران پێ نەدە و ئەگەر کەسەکێ ژی بهایەکێ گەلەك مەزن دا تە، پتر ژ وی بهایێ تە هەی، بۆ خۆ بهێلە و د سەردا نەچە، چونکی هەمی کەس بهایەکێ مەزن ب مرۆڤی نا بەخشن و دەستدانا وی کەسی بۆ تە ب چ تشتان ناهێتە قەرەبووکرن و تو نەشێی دووبارە وی کەسی ب دەست خۆ ڤە بینی، یان ژی کەسەکێ وەکی وی بهایی ب تە بدەت بهێتە د ژیانا تە دا.
