د.لەتیف رەشید سەرۆک کۆمار، دوێنێ لەکۆشکی بەغدا، پێشوازیکرد لە خانەوادەی قوربانیانی بێسەروشوێنەکانی کوردانی فەیلی لەسەردەمی رژێمی پێشوو.
لەدیدارێکدا، سەرۆک کۆمار هاوخەمیی سەرۆکایەتیی کۆماری بۆ کەسوکاری قوربانیان دووپاتکردەوە و جەختیشی کردەوە لەگرنگیی دۆکیۆمێنتکردنی تاوانەکانی رژێمی پێشوو، قەرەبووکردنەوەی قوربانیان و مسۆگەرکردنی دادپەروەری کە بگونجێت لەگەڵ نەهامەتییەکانیاندا.
سەرۆک کۆمار ستایشی قوربانیدانی کوردانی فەیلی کرد لە روبەڕوبوونەوەی رژێمی دیکتاتۆری و بەرەنگاربوونەوەی کۆیلەکردن و نادادپەروەری و جەختیشیکردەوە، ئەوان بەشێکی دانەبڕاون لە گەلی عیراق کە شایستەی هەوڵی هاوبەشن بۆ پشتیوانیکردنیان لەپێناو بەهێزکردن و پتەوکردنی پێکەوەژیانی کۆمەڵایەتیی ئاشتیانە و دووپاتیشی لە گرنگیی بەردەوامیی لایەنە پەیوەندیدارەکان لە گەڕان بۆ دۆزینەوەی رووفاتی قوربانیان و گەڕاندنەوەیان بۆ خانەوادەکانیان وەک مافێکی مرۆیی و مۆراڵی، کردەوە.
لای خۆیانەوە وەفدەکە، کە لە سامیە عەزیز فەیلی، رەنگین عەبدوڵڵا، رازاو مەحمود فەرەج و سۆزان محەمەد پێکهاتبوون، دۆخی گشتی و ئەو ئاستەنگانەی ژیان کە رۆژانە رووبەڕووی کوردانی فەیلی دەبێتەوە خستەڕوو، هاوکات پێشنیازەکانی سەرۆک کۆماریشیان بەرزنرخاند لە دابینکردنی پێداویستییەکانیان و پاراستنی مافەکانیان.
