ـ ئەحمەد بەندی (كەلینا ئاخێ) دكەتە رۆمان
كەلینا ئاخێ، رۆمانا نەخری یا نڤیسەر (ئەحمەد بەندی)یە و پەرتووك ژ (180)ێ لاپەرێن قەارێ ناڤین پێكدهێت و نڤیسەرێ رۆمانێ د پەرەگرافەكێ رۆمانا خوەدا دبێژیت: «ئەو دەمەكێ درێژ بوو، ئەو ڤەقەتیان چێببوو. ڤەقەتیانەك بوو، نە وەكی چ ڤەقەتیانان. ئەگەر راستییەك بۆ چیرۆكا مەم و زینێ یان فەرهاد و شیرینێ یان خەج و سیامەندی یان لەعلیخانا گوڤەیی هەبیت، نە وەكی وان ژی بوو. مەم و زین، فەسادێ نیشا مە ددەت. فەرهاد و شیرین، بێ دلۆڤانی و نە مرۆڤایەتیێ نیشا مە ددەت. خەج و سیامەند، رەڤاندنێ و زڕتەكیێ نیشا مە ددەت. لەعلیخانا گوڤەیی، خیانەتێ نیشا مە ددەت و ئەڤە ژی هەر چوار دكوكا خۆدا سالۆخەتێن مرۆڤانە!.».
ـ بیرەوەریێن خوەیێن
پێشمەرگاتیێ دكەتە پەرتووك
بیردانكا وژدانێ.. پێشمەرگەتی، هزری، جڤاکی، چەکداری و تاکەکەسی، ئەڤە ناڤێ پەرتووكا نڤیسەرێ پێشمەرگە (نیشان بامەرنی)یە و پەرتووك ب قەبارێ ناڤین و ب (367) لاپەران ژبن چاپێ دەركەفتییە. لدوور پەرتووكا خوە، نڤیسەر د پێشگوتنا پەرتووكێ دا دبێژیت: «ئەگەر ئەز ب کورتی بێمە سەر ناڤەڕۆکا ڤان بیرەوەری و دیدەڤانیێن خوە، هەموو قۆناغێن ژیانا من دگەل وێ دەردۆرا ئەز تێدا دەرباز بوویم ب خوە ڤە دگرت؛ گەلەک جاران؛ د بەر ڤێ نڤیساندنێ ڕا، ئەز دئێشام و دگریام، کەیفخوەش دبووم و دکەنییام. لێ هەر دو ئالییان ژی ئەز تەمام دکرم و جوانی و کرێتیا ژیانێ نیشا من ددا. هەلبەت ئەگەر هوسان نەبت ژی، چ تام د ژیانێ دا نامینت. لەوما ژی یا گرنگ ئەوە مرۆڤ د هەر دو ئالییان دا خوە تۆشی لاوازی و بێئومێدیێ نەکت. بەلکو، هەمبەری خوەشی و نەخوەشیان ل سەر پێن خوە بمینت. ڕاستە مرۆڤ گەلەک جاران دهێتە تێکشکاندن و دکەفتە تەنگاڤییان، لێ ئەو حەز و ورە و ڕوحا د مرۆڤی دا هەی، چ جار نامرت و ناهێتە شکاندن، ئەگەر مرۆڤی ئەو حەز و ڤییان هەبن و ب کار بینیت، دی هەر رۆژەکێ ئەوا مرۆڤ ل هیڤیێ گەهیتێ و بینت».
ـ سەلام بالایی
ل شەڤێ دزڤریتەڤە
ناڤێ دیوانا وی یا شعری یا نوی (3-13و 33 شەڤ) و دیوان ب هەردوو پیتێن ئارامی و لاتینی كەفتیە بەر دەستێ خواندەڤانان و پەرتووك ژ 126 لاپەرێن قەبارێ ناڤین پێكدهێت. لدوور ناڤێ پەرتووكێ و ئەڤ ژمارەیە چ رامان ددەن، دبێژیت: « ـ (3)، سێگوشەیا زەرەدەشتیان.
ـ (١٣)، تابلۆیێ (لیوناردۆ داڤنشی) شیڤا داویێ یا مەسیحی، (١٣) ژمارا رەشبینیا ئیتالی و من نەدزانی دێ (13) سوارێن بەهدینان هێنە سێدارەدان.
ـ (٣٣)، گوللەیێن هەلبەستڤانێ تورک ئەحمەد ئارف و (٣٣) شەهیدێن روبۆسکێ و (٣٣) گوللەیێن هەلبەستڤان نجیب بالایی.».
