مامۆستا جەعفەر*
پێش چارەكە سەدەیەك، چاوێكم بە شیعرە عەرەبییەكانی (نالی)، یان دانانی نیو بەیتێكی عەرەبیی وەكو (تضمین) له قەسیدە و غەزەلەكانی ناو دیوانە بڵاوكراوەكەیدا گێڕا، گومانێكی لا دروست كردم. بەرەبەرە راستییەكم بۆ دەركەوت: (ناسخ)ەكان هەڵەیان كردووە و زانای گەورە مامۆستا (مەلا عەبدولكەریمی مودەریس) و كوڕەكانی، رێگەیان بە خۆیان نەداوە، هەڵەی (ناسخ)ەكان
دەستكاریی بكەن. من دڵنیام شاعیرێكی بلیمەتی وەكو (نالی)، بەو هەموو توانا و دەسەڵاتە زمانەوانی و شارەزاییەوە لە (علم العروض)دا، زەحمەتە هەڵەی وا بەسەریا تێپەڕیبێت. ئەم بەیتەی خوارەوە نموونەیەكە لە نموونەكان:
سهم ألف القد فقد صاد فٶادي
صاد هو من عینه، قد صاد فسادا ل85
ئەم شیعرە لە: (بحر الرمل) دادەنرێت، واتا
فاعلاتن/ فاعلاتن / فاعلات
كەواتە: بۆئەوەی كێشی بەیتەكە رێك بێت، دەبووایە بەم شێوەیەی خوارەوە بنووسرێتەوە:
سهم ألف القد قد صاد فٶادي
صاده من عینه، صاد فسادا
لە یەك بەیتدا، سێ جار وشەی (صاد)هاتووە! عەطار و سەعدی و حافز، هەندێكجار یەك وشەیان سێ چوار جار لە بەیتێكدا بەكارهێناوە. پیتی (ص) لای شاعیرە كلاسیكییەكان، ئاماژەیە بۆ شێوەی چاوی جوان. لەم بەیتەدا (چاو)، ناوەند و كلیلی بەیتەكەیە. وشەی(صاد) گرتنی نێچیرێك دەگەیەنێت. (سهم ) و (ألف) و (القد) سێ وشەن بۆ یەك مەبەست: وشەی بەژن و باڵای كوردی، ئەم تیرە، كە بەژن و باڵای یارە، (دڵم)ی بە نێچیر گرتووە. كەسێك، دڵێك، كە بە نێچیر دەستگیركرا، ئیدی وەكو (دیل) دەبێ حیسابی بۆ بكرێت. بە چاو، دڵی بە نێچیر گرت، گرتی و باڵادەستی دەستەبەر كرد .
*ئەندامی یەكێتیی نووسەرانی جیهانPEN
