كاتێك لاپەڕەكانی مێژووی درووستبوونی عێراق هەڵاوێرد دەكەی؛ دەڵێی ئەم عێراقە بۆ نەتەوەی سەردەست و كۆڵونیالێكراو دامەزراوە و قۆناغ بە قۆناغ و وێستگە بە وێستگە ڕەخسیوە، بۆ ئەوەی نەتەوە و پێكهاتە و گروپە بن دەست و كۆڵونیالێكراوەكان كۆمەڵكوژ (جینۆساید) بكات و لە كۆتاییشدا یەك ڕستە لای نەتەوەی سەردەست ماوەتەوە (یان دەبێتە بەشێك لەمن و لەناو مندا دەتوێیتەوە یان مانەوەت وەك خۆت دەتخاتە بەردەم شاڵاوی لەناوچوون) مێژووی دوور و نزیكیش دەیان نموونەی سەلمێنراومان دەخاتە بەردەست.
ئەگەر بمانەوێت بە زمانێكی سادە و بێگرێ پێناسەیەك بۆ عێراق بكەین؛ دەبێت بێژین وڵاتێك بۆ نەتەوەی سەردەست و بەرهەم هێنانی فاشیزم و بە واتایەكی تر، بژاردەی حكومڕانی نەتەوەی سەردەست لە عێراقدا (عەرەب) فاشییزم لەناو خڕۆكەی خوێن بەرەكانی جەستەیدایە و لە ترۆپكی پڕوپاگەندەی دیموكراسی و پێكەوەژیاندا، لەبۆ دەرفەت دەگەڕێت تا نەتەوە ناعەرەبەكانی تر لە ڕەگەوە هەڵكێشێت و بسڕێتەوە؛ هەموو جارێكیش پاساوی بۆ ئەمە یەكپارچەیی خاكی عێراقە، ئەو عێراقەی بە تۆبزی و دوور لە خواستی پێكهاتەكانی جگە لە عەرەب دروستبووە.
دەمەوێت ئەوەش بێژم كە خوازیارم ئەم بۆچوونە وەك ناسیۆنالیشێكی بەرچاوتەنگ لێك نەدرێتەوە، بەڵكو وەك بینینێكی بابەتیانە بۆ عێراق و نەتەوەی سەردەست لە عێراق ببینرێت، عێراقێك بۆ نموونە دەیەوێت (خاكی كوردستان، ژینگەی كوردستان، كەولتووری كوردستان، زمانی كوردی، جوگرافیای كوردستان، مێژووی كوردستان، ڕابردووی كوردستان و ئێستاو داهاتووی كوردستان، ئابووری ژێرزەوی و بان زەوی كوردستان)ی كوردستان تێكڕا بۆ خزمەتی عێراقیبوون و لە كۆتایدا لە خزمەتی فاشیزمی نەتەوە و ئاین و مەزهەبی سەردەستی كۆڵۆنیالكەربێت!
بەتەواوی لەگەڵ چەمكی پێكەوەژیاندام و لەوەش تێدەگەم كە مرۆڤ لە هەرشوێن و جێگایەك بێت مافی ژیانكردنی هەیە،؛ بەڵام لە عێراقدا جگە لەو قۆناغانەی باری دەوڵەت خواربووبێت بۆ تەحقیقكردنی مەرامەكان بە ڕووكەش باسی پێكەوە ژیان كراوە و هەر نەختێك ئەوئەوباری خوارییەیی ڕاست بووبێتەوە، بە ئاگر و ئاسن و تا جینۆساید هەڵس و كەوتی كردوەو ڕەفتاری كردووە.!
ڕەنگە باشترین نموونە (هەمیشە مكوڕبووم لەسەر ئەوەی مەترسی دووبارەبوونەوەی جینۆساید لە عێراق مەترسییەكی كراوەیە) پاش ڕووخانی حكومەتەكەی بەعس، زۆرێك پێیان وابوو كە ئیتر لوتی فاشیزم لە عێراق شكا، یاخود جارێكی تر فاشیزم لە عێراق زیندوو نابێتەوە و لەو شوێنیدا دەوڵەتێكی (مەدەنی - دیموكراتی) دادەمەرزێت و هەموو نەتەوە و پێكهاتەكان تیایدا چوون یەك یەكسان دەبن؛ ئەمە جگە لە خەون و خەیاڵێكی سەرابی هیچی تر نەبوو، !
چونكە ئەگەر پێشووتر و لەماوەی حكومڕانی حكومەتە یەك لەدوای یەكەكان لە دوای دروستبوونی دەوڵەتی عێراقەوە، زۆرترین ماوە فاشیزمی نەتەوەیی سەردەست (عەرەب) باڵادەست بووبێت و دەستی لە هیچ شێوازێك تا تاوانی جینۆساید نەپاراستبێت لە دژی نەتەوە و پێكهاتەكانی تری غەیری عەرەب بە تایبەت لە دژی كوردداو كوردستان؛ ئەوە ئێستا و دوای نەمانی بەعس وەك دەبینین جگە لە فاشیزمی نەتەوەیی، فاشیزمی دینی و مەزهەبیش بووەتە سەربار و ترسناكتر لە فاشیزمی نەتەوەیی دەركەوتووە و هەڕەشەی لەناوبردن دەكات، كە بێگومان ئەم نموونەیە بۆ هەریەك لە (ئێران-توركیا-سووریا)ش ڕاستە.
