راپۆرت: دلبرین غازی
نەهاتنا بارانێ زیانێن مەزن گەهاندینە جووتیاران و تایبەت ئەڤ جووتیارێن زەڤیێن خو كێلاین و گەنم هاڤێتییێ و بارانا پێدڤی ل سەر نەهاتی. پشتی بارانێن بهارێ یێن ڤێ دوماهییێ، چەندین جووتیار دووبارە ڤان زەڤیان دكێلنەڤە و گەنمی دهاڤێژنێ، ب هیڤیا وێ چەندێ بەشەكێ زیانێن وان بۆ بهێتە قەرەبووكرن و لهیڤیا وەرزەكێ بارانێ و دلوڤانیا خودێ نە. هاولاتی (محەمەد تەوفیق) ئێك ژ جووتیارێن دەڤەرا بەردەرەش و لدویڤ گوتنێن وی نزیكی (300) دونەمێن عەردی كێلابوون و ژبەر نەهاتنا بارانێ، گەنمێ وی ب سەر نەكەفت، ئەڤ هاولاتییە دبێژیت: «من نزیكی (300) دونەمێن عەردی كێلابوون و من گەنم هاڤێتبوویێ و ژوێ رێژێ ژی باوەردكەم جهێ (200) دونەمێن چاندنێ زیان بمن بكەڤیت و نوكە من ل بەرە ئەز دوبارە عەردێ خوە بكێلم و گەنمی لێ بچینم ڤە و هیڤیا مە ژ خودێ و دلوڤانیا خودێ یە باران بەردەوام بهێن». لدوور زیانێن گەھشتینە ڤی جووتیاری، ڤی هاولاتی گوت: «زیانێن من دگەھنە شەش بۆ حەفت ھزار دولاران و بۆ هەر تغارەكا گەنمی نزیكی ملیون دینار تێدچن». ڤی جووتیاری بەردەوامی دا ئاخفتنا خوە و گوت: «بەری چەند سالان ژی وەك ڤێ سالێ باران كێم هاتن و زیان گەهاندنە جووتیاران و لێ ئەڤ سالە د چ حساباندا نینە و نەهاتنا بارانێ زیانێن مەزن گەهاندنە دەڤەرێ هەمییێ». سەید عەزیز شوفێرێ تەرەكتورێ یە، گوت: «ئەز بەحسێ دەڤەرا بەردەرەش بكەم، زیانێن مەزن گەھشتینە گەنمی و نوكە جووتیاران دوبارە دەست ب كێلانا زەڤیێن خوە كریە ڤە و بۆ كێلانێ دڤێت جووتیار پێش وەخت نوبەتا خوە بگریت تا تەرەكتور بگەهیت و بچیت زەڤیا وی بكێلیت». لدویڤ گوتنێن رێڤەبەرێ چاندنێ ل ئاكرێ بن، ئەڤ سالە بەراورد دگەل پار باران گەلەك كێم بارینە و د ئەڤ سالەدا تا بەری حەفتیەكێ ژی، بتنێ 157 ملیمێن بارانێ هاتینە و پار تا ڤی دەمێ 556 ملیمێن بارانێ هاتبوون و ئەڤە ژی بەراوردیەكا مەزنە. لدوور گازندەیێن جووتیارێن ڤێ دەڤەرێ، ئەو دخوازن رێ ب وان بهێتەدانێ ئەو (بیرتیوازییا) دناڤ زەڤیێن خوەدا بكولن، دا ژ مەترسیا نەهاتنا بارانێ رزگار ببن.
