بۆ ساڵڕۆژی جینۆسایدی خوشک و برا ئێزدییەکان و پەلامارە داگیرکاری و وێرانکارییەکانی تیرۆریستانی داعش بۆ سەر شەنگال و دەوروبەری، مەکتەبی سیاسیی یەکێتی پەیامێکی بڵاوکردەوە کە ئەمە دەقەکەیەتی:
لە یانزەیەمین ساڵڕۆژی جینۆسایدی خوشک و برا ئێزدییەکان و پەلامارە داگیرکاری و وێرانکارییەکانی تیرۆریستانی داعش بۆ سەر شەنگال و دەوروبەری، سەری رێز و نەوازش بۆ شەهیدانی ئەو کارەساتە دژ بە مرۆڤایەتییە دادەنەوێنین و بەخەمێکی پڕ لە ئازارەوە ئەم یادە دەکەینەوە.
ئێزدییەکان وەک خاوەنی رەسەنی شەنگال و دەوربەری لە بزووتنەوەی کوردایەتیدا هەمیشە پێشەنگ بوون و رۆڵی پڕ جوامێرانەیان بینیوە، بۆیە بە درێژایی مێژوو لەلایەن داگیرکەرانەوە چەندینجار پەلاماردراون و (فرمان) کراوەتە سەریان.
بۆ ساڕێژبوونی یەکجارەکیی ئەو زامە پڕ لە سوێیە، ئێستا لە هەموو کاتێک زیاتر پێویستمان بە بڕیارێکی یەکگرتوو هەیە لە نێوان حکومەتی هەرێم و حکومەتی فیدڕاڵدا کە گشت لایەنەکانی کوردستانیش پشتگیری و پشتیوانیی لێبکەن لەپێناوی گەڕاندنەوەی گشت ئاوارەکان بۆ سەر زێدی خۆیان.
هەر بۆ ئەو مەبەستەش یەکێتیی نیشتمانیی کوردستان پشتیوانی و هاوکاریی خۆی دووپاتدەکاتەوە بۆ هەر هەنگاوێک کە ببێتە مایەی بوژاندنەوە و سەقامگیری لە شەنگال و بەجینۆسایدناساندنی ئەو تاوانە لە ئاستی نێودەوڵەتیدا.
دروود بۆ رۆحی پاکی شەهیدانی شەنگال و سەرجەم شەهیدانی رێگای رزگاریی کوردستان
مەکتەبی سیاسیی
یەکێتیی نیشتمانیی کوردستان
