راپۆرت: ئاڤدۆ
دهۆكێ باژێرەكە دكەڤیتە دناڤبەرا دو چیایێن بلند دا و ئەڤە ژی دبیتە ئەگەر، كو ژینگەها وێ یا پاقژ نەبیت و ژینگەپارێز ژی دبێژن، دڤێت رێژا كەسكاتییێ ل دهۆكێ ژ 20% كێمتر نەبیت، تا بشێت قەرەبوویا وێ پیسبوونێ بكەت. چالاكڤانەك دبێژیت: «ژبەركو دهۆكێ دكەڤیتە ناڤبەرا دو چیایاندا، ئەڤە ئەگەرە كو ژینگەها وێ و كەش و هەوایێ وێ بەردەوام یێ پیس بیت، ئەگەر دگەل رێژا ترۆمبێلێن دناڤ باژێریدا بەراورد بكەین و ئەو دوكێلا ژێ دەردكەڤیت و دیسان موەلیدێن كارەبێ و دكێلا وان ئەوا ب سەر مالان ڤەدچیت، ئەڤە هەمی ئەگەرن كو بەردەوام ئەڤ ژینگەهە د نە پاقژیێ دا بمینیت».
دێ چاوان شێین ژینەها دهۆكێ پاقژ هێلین، ئەڤە ئەو پرسیار بوو یا مە ژ سەرۆكێ رێکخراوا پێگەهاندنا پاراستنا ژینگەهێ كری، گوت: «دا كو ژینگەها دهۆكێ بهێتە كونترۆلكرن، دڤێت رێژا كەسكاتییێ بهێتە زێدەكرن و دیسان ئەڤ ژمارا زێدەیا ترۆمبێلان ل ناڤ باژێری هەی، رێژە بهێتە كێمكرن، بۆ نموونە رێكارێن نوی یێن گەهاندنێ هەبن وەك پاسێن مەزن و میترویا و خەلك كێمتر ترۆمبێلێن خوە ب كار بینن، كو مخابن گەلەك كەس بۆ كارێن نە پێدڤی ژی ترۆمبێلێن خوە د بەنە ناڤ باژێری و ئەڤە ژی نە بتنێ قەرەبالغییێ دروست دكەت، بەلكو دبیتە ئەگەرێ پیسبوونا ژینگەهێ ژی». تارق عەبدال، زێدەتر گوت: «ل سەر مە هەمیان پێدڤییە ئەم رێژا كەسكاتییێ لناڤ باژێری و دناڤ مالێن خوەدا زێدە بكەین و چاڤێ خوە بدەینێ، دڤێت ئەم نەبینە ئەگەرێن پیسبوونا ژینگەهێ، بەلكو هەر ئێك ژمە ژلایێ خوەڤە یێ هەڤكار بیت، چ ب راگرتنا پاقژیێ بیت یان ژی نە هاژوتنا ترۆمبێلێ ئەگەر بۆ تشتەكێ پێدڤی نەبیت و ئەڤە بەرپرساتییا مە هەمیان پێكڤەیە». تارق عەبدال سەركێ رێكخراوا پێگەهاندنا پاراستنا ژینگەهێ گوت ژی: «مخابن نوكە ئەم دبینین كو ژینگەھـ یا دبیتە قوربانی كەرتێ وەبەرهێنانێ و ل رەخ و دوورێن باژێری ب دەهان مەزرەعە هاتینە دروستكرن و تا ئەو مەزرەعە دهێنە دروستكرن، چەندین دار دهێنە برین و ئەڤە ژبلی ئالوزیێن سیاسی یێن دناڤبەرا پەكەكێ و توركیادا، كو سالانە چەندین داروبار دهێتە سوتن و هیڤیا مە ئەوە ژ خودانێن مەزرەعا، دەما ئاڤاهیێن خوە دروست بكەن، ئەو بخوە وەك بەرپرساتییەك بەرامبەری باژێرێ خوە، دارا زێدەتر بچینن و چاڤدێرییا كەسكاتیێ بكەن ژبۆ پاقژراگرتنا ژینگەها باژێری دەوروبەران».
لدوور پلانێن باژێرڤانیا دهۆكێ ژ بۆ زێدەكرنا رێژا كەسكاتییێ، پەیڤدارێ سەرۆكاتیا باژێرڤانییا دهۆكێ گوت: «رێژا كەسكاتییێ ل باژێرێ دهۆكێ نوكە 14%ێ یە و ب دووماهی هاتنا هەردوو پاركێن مەزن پاركا سەرھلدان كو قەبارێ وێ (46) دونەمە و پاركا گشتی یا دهۆكێ كو قەبارێ وێ (630) دونەمە، رەنگە ئەڤ رێژە بگەهیتە 20% و دگەلدا مە چەند پلانێن دی ژی بۆ ناڤ باژێری هەنە و لدویڤ نەخشێ بنیاتی بۆ باژێری هاتییە دانان، دێ چەندین جھـ بنە پارك و دێ كەسكاتی ل باژێری زێدە بیت». ئیسماعیل مستەفا سەبارەت پاقژیا باژێری گوت: «دهۆكێ نازناڤێ پاقژترین باژێر وەرگرتییە و بۆ ڤێ ژی بەردەوام چاڤدێری ل سەر كومپانی و جهێن گشتی و ئەو جهێن گازندە یان گلش دكەڤیتێ هەیە و دیسان بەردەوام مە هەوێن راكرنا گلێشی بۆ دەردوورێن باژێری هەیە تایبەت ئەو جهێن خەلك قەست دكەتێ و هیڤیا مە ئەوە ئەم ڤێ پاقژیێ راگرین و باشتر لێبكەین و بۆ كەسكاتییێ ژی، پلانێن مە سەربگرن و ئەڤ رێژە بگەهیتە ستاندەردێ جیهانی یێ كەسكاتییێ، كو ئەو ژی 20 %یە.
