سیامەند هاریكی
رۆسان گەلەک پەند ژ یەکێتیا سۆڤیەت وەرگرتن، بتایبەتی د بیاڤێ سیاسەتا دەرڤەدا. سۆڤیەتا کەڤن ب ناڤێ چەپ، کۆمۆنیستییێ و سۆسیالیستییێ، هاریکاریا سەدەها رێکخراوان دبن ڤان ناڤاندا ل جیهانێ دکر، وەسا هزر دکر دێ جیهانێ هەموویێ ب رێیا ڤان پارت و رێکخراوان کەنە هەڤالبەند و هەڤپەیمانێن خوە یێن ستراتیجی، ژبەر هندێ گەلەک های ژ لاوازبوون و گەنیبوونا ئەوێ ناڤەندێ نەبوو، هەتا شیرازێ وانێ ئایدیۆلۆجی و حزبی ب تەڤاهی لبەرئێک چووی و هەلوەشیای.
گەلەک ژ وان پارت و رێکخراوێن سیاسی ژی ل جیهانێ، دبن وان ناڤێن گراندا بازرگانی بخوە ب وان هزر و بیران دکر، نەک هەر چ خێر و بەرهەم بۆ مۆسکۆ نەبوون، بەلکو ئەو هزر و بیر پتر لبەر چاڤێن جیهانێ رەشکرن، گەلەک جاران ئاوازەک بۆ خەلکی دخاند، کو قەد لگەل ژیان و کەلتورێ وان جڤاکان نەدگۆنجی، ب تەڤاهی سیاسەتەکا دژەبا پێڕەو دکر.
گەلەک ژوان دەولەتێن بزوورێ ژی کریە چەپ و بناڤ سۆسیالیست، وەکو ماسی و ئاڤێ بخوەڤە گرێدابوون، بتەڤاهی ب هاریکاری و فەرمانێن موسکۆڤە گرێدایبوون، دەمێ (گۆرباچۆڤ) ب بەرنامێ پێرۆسترۆیکا و گلاسنۆست پێشخستی، دیوارێن ئەوێ کەلها مەزن هەموو ل بەرێکچوون و پڕانیا وان وەڵاتان ئازادبوون، ئەو هەموو پارت و رێکخراوێن سیاسی وەکو بەفرا کێری یان بۆهژین یان هند بێ باندۆر و لاوازبوون، وەکو پارتا کۆمۆنیستا سۆڤیەتی ناڤێ وێ ژی هندە نامینیت.
پشتی هاتنا مەسعود پزیشکیان سەرۆک کۆمارێ نوی یێ ئیران و هێرشا 7ێ ئۆکتۆبەرێ یا رێکخراوا حەماس بۆ سەر ئیسرائیل، تەلئەبیب بەرسڤدایینەکا توند ل دژی هەموو وان گروپێن گرێدایی ئیرانێ دەستپێکرییە، لێ نوکە ئیران مژویلی پاراستن و بهێزکرنا ناڤخوەیا خوەیە ژبەر وێ چەندی حەماس، حوسیێن یەمەن و حزبوڵڵا ها لوبنانێ بۆ وی گرنگ نینە، ب تنێ مژوڵا ئەرکێ خوەیێ گرنگە کو بریتییە ب پاراستنا بەرژەوەندییا ولاتێ خوە!. لبەر ڤێ چەندی ڤان گرۆپ و رێکخراوێن دی وەکی پارتێن کۆمۆنیستیا بەری یان نامینن، یان ژی ب تەمامی لاواز دبن. ولاتێن دی ژی دخازن چاڤ ل ئەمریکا و چینێ بکەن و ئەولەهی و بەرژەوەندیێن نەتەوەیێن خوە بێخنە بەری هەر تشتەکی و هەر دەولەتەکا دی. ب دیڤەکا دی دکارین بێژین، هەر کەس کۆڕێ بابێ خوەیە، پشتی هاتنا ترامپ، ئەڤ رێباز و بەرنامە پتر خستن مەریەتێ، تەڤلهەڤیەک ئێخستە جیهانێ بگشتی، بەلێ وەکو دیار، ل داویێ ژی دێ هەر ئەو بیت یا ئەو دکەت و دبێژیت.
