دیڤچوون: دلڤین ھادی
مالپەرێن تورێن كومەلایەتی بڤێ چەندێ دھێنە ناسكرنێ، تورێن هەڤناسینێ و پەیوەندیكرنێ نە و باشترین چیرۆك ژڤێرە دەستپێدكەن. دبێژن گەلەك كێشەیێن خێزانێ ژ تورێن كومەلایەتی دەستپێدكەن و بەرەڤ جودابوونێ دچن، تایبەت ژی فەیسبۆك، دادگەهـ ژی دیدەڤانیێ بۆ ڤێ چەندێ ددەن، بەلێ مە چ جارەكێ ل سەر پەیوەندیێن حەژێكرنێ نە ئاخفتییە، ئەڤێن ژ ئەگەرێ فەیسبۆكێ بەرەڤ هاوسەرگیریێ چووین، پێنەڤێت ژی وەك هەر پەیوەندیەكا هاوسەرگیریێ یان دێ بەردەوام بیت یان ژی دێ ژ بەرئێكچیت.
چیرۆكا شانێ:
شانێ ناڤەكێ خوازراوێ كچەكێ یە، بڤی رەنگی چیرۆكا خوە دبێژیت: «من زانكۆ ب دووماهی ئینایە و پشتی دەرچوونێ ژی ئەز دخانیڤە مام، مە هەڤالێن زانكۆیێ گرۆپەك هەبوو و هەردوو رەگەز دوی گرۆپیدا هەبوون، رۆژەكێ بابێ هەڤالەكێ مە چوو بەر دلوڤانییا خودێ و من ل سەر رێكا ژمارا وی پەیوەندی پێكر، دا سەرەخۆشیێ لێبكەم، ژ وێ رۆژێ ژی چیرۆكا حەژێكرنا مە دەستپێكر و نزیكی شەش هەیڤان ڤەكێشا و پاشی پەیوەندیێن مە زێدەتر لێھاتن و تا بابەت گەھشتییە ھاوسەرگیریێ و شوكۆر بۆ خودێ ئەڤە زێدەترە ژ دوو سالان ئەم گەل ئێك و وەك خێزانەكا سەركەفتی ئەم خوە دبینین». لدوور پرسیارەكێ، ما ئەو كورێ تە پەیوەندی دگەل گرێداین ھین هەڤالێن ئێكێن زانكویێ نەبوون؟ شانێ گوت: «بەلێ بۆ ماوێ چار سالان ئەم ل ئێك زانكۆ بووین و لێ چ جارەكێ من باوەرنەدكر دێ پەیوەندییا حەژێكرنێ دناڤبەرا مەدا دروست بیت، ژبەركو ل زانكویێ ئەو دەرفەت نینە كور و كچ بشێن هەڤناسیینا دروست دگەل ئێك بكەن و بزانن ئایا دێ شێن هەڤژینیێ دگەلئێك پێكئینن یان نە، لێ دگەل مالپەرێن تورێن كومەلایەتی دەلیڤەیێن دانوستاندنێ زێدەتر یێن هەین و مە هەمی تشت ب راشكاوانە دگەل ئێك بەحس دكرن و مە دانوستاندن ل سەر دكر و مە ئەم دێ شێین خێزانەكا سەركەفتی پێكئینین».
داخوازێن هەڤالینیێ:
پرانیا بەكارهێنەرێن تورێن كومەلایەتی، رۆژانە ب دەھان داخوازنامێن هەڤالینیێ بۆ دهێن، (شیرین) ژی كو ئێك ژوان كەسان بوو و كەسەكێ بناڤێ رێناسی گەلەك رژدی دكر، بەردەوام داخوازناما هەڤالینیێ بۆ فرێدكر و وێ رەد دكر و تا برێكا نامێن تایبەت ژی، ئەڤ داخوازییە بۆ فرێدكر و بەردەوام كومێنت ل سەر پوستێن وێ یێن فەیسبۆكێ بۆ دنڤیسین و ژبەركو وێ ئەو ناس نەدكر و كەسێن نەنیاس وەرناگریت، ل دووماهیێ بریارێ ددەت، كو دەرفەتەكێ بدەتە ڤی كورێ بناڤێ رێناسی و ئەگەر دیت هەڤالینییا وییا نەخوشە، هینگێ دشێت ژناڤ لیستا هەڤالێن خوە دەربكەت و داخوازناما وی قەبیل كر و دیت كو گەنجەكێ تژی و رەوشەنبیرو و رەوشتێ ویێ باشە و ژ وێ داخوازكر، كو ئەو حەز دكەت پەیوەندیێ دگەل گرێبدەت و دووماهییا ڤێ پەیوەندیێ ژی، ل هاوسەرگیریێ راوەستا و نوكە وان كورەك ب ناڤێ یادگار هەیە.
تورێن كومەلایەتی چەكەكێ دوو سەرن
من باوەری ب تورێن كومەلایەتی نینە، لێ ئەز ناڤەشێرم (4) هەڤالێن من برێكا فەیسبۆكێ بووینە خودان هەڤژین و ھندەك ژوان نۆكە خودان زارۆكن. ئەڤە گوتنێن دلینێ بوون، وەك چالاكڤانەكا كومەلگەهێ مەدەنی دھێتەناسكرنێ و خودان هەڤژینە، سەبارەت هەڤژینیا خوە گوت: «هەڤژینیا من برێكەكا كلاسیك بوو، ئەڤێ ھاتیە داخوازییا من ژی یێ ناسیار بوو، راستە مە چ كێشە نینن و ئەز هەڤژینییا خوە ب سەركەفتی دزانم، لێ مە ئەو دەرفەت نەبوون ئەم دگەل ئێك باخڤین و بزانین ئایا ئەم دگەل ئێك دگونجین یان نە». سەبارەت بۆچی وێ باوەری ب پەیوەندیێن تورێن كومەلایەتی نینە، دلینێ گوت: «من باوەری پێنینە ژبەركو ئەڤێن ل تورێن كومەلایەتی پەیوەندییان گرێددەن، د پەیوەندیێن خوەدا د رژد نینن و ب سڤكی وەردگرن، ژبەركو دانوستاندنا دگەل ئێك نە وەك وێ چەندێ یە تو دگەل كەسەكی پەیوەندییا گرێدەی و ھین ل بەرامبەری ئێك نەبن».
شڤان ئێك ژ ئەندامێن گروپێ مالپەرەكێ گوتار نڤیسینێ یە ل سەر مالپەرێ فەیسبۆكێ، گوت: «ژبەركو ئەم جڤاكەكێ داخستینە و ئایندارین و رێ ب پەیوەندیێن كور و كچان ناھێتەدان، بوویە ئەز پەیوەندیێن ئەنترنێتێ ب سەركەفتی دزانم و ئەگەر كەسەك هەبیت بابەتی بۆ خوە ئیستیغلالبكەت، ئەو ژ نەزانینا كوری یان كچێ یە و بتنێ ل سەر هەردوویان پێدڤییە زێدەتر ھشیاری خوە بن تا باش ئێك و دوو ناسبكەن و تشتێ خوش دڤان تورێن كومەلایەتیدا ئەوە، ئەگەر تەدیت كەسەك نەجھێ باوەریێ یە، تو دشێی وی بلۆك بكەی و من بخوە پەیوەندی دگەل دوو كچان هەبوویە و ئەز یێ رۆژد بووم بۆ بابەتێ هەڤژینیێ، لێ ئێك ژوان بمن رازی نەبوو و خوە ژمن دویر كر و نوكە پەیوەندیێن من دگەل ئێكا دی د باشن و ئەم ل دەلیڤەكێ دگەرین ئەز بچمە داخوازییا وێ بۆ پێكئینانا پرۆسا هەڤژینیێ».
