بێریڤان حەجی محەمەد
دەما كاركرن نەبیت، شوینا ئەڤ ھێزا گەنجی یا مفادار بیت و ئایندەكی بۆ گەنجی دروست بكەت، دێ بیتە بارگرانی ل سەر مالباتا خوە و دێ هەست كەت وی شیانێن تشتەكی نینن
ھێزا كاری مەبەست ژێ مرۆڤ، ئەوێن شیانێن كاركرنێ هەین. ئەگەر ھێزا كاری هەبیت و مرۆڤ هەبن و ئەڤ مرۆڤێن هەنێ بشێن كاری بكەن و كار نەبیت، دبێژنە ڤێ چەندێ بێكاری. ئایا بێكاری ل كوردستانێ هەیە؟ بێگومان بێكاری یا هەی و ئەڤرۆ دێ ھزاران كەسان بینی و شیانێن كاركرنێ یێن هەین، لێ دەلیڤێن كاری و كاركرنێ نین و ئەڤ بێكارییە كارتێكرنا خوە ل سەر دەروونێ مرۆڤی یا هەی، دبیتە ئەگەرێ چەندین نەخۆشییان و ژوان ژی خەمۆكییێ لدەف مرۆڤی پەیدا دكەت و ئەڤ خەموكییا هەنێ چەندین نەخوشیێن دی ژێ دەردكەڤن و دەرووی نە ئارام دكەت و گەنج كەسێن ئێكێ نە دبنە قوربانیێن ڤێ نەخوشییێ.
وەك ئەم دزانین گەنج ھێزا كارینە، د تەمەنێ گەنجاتیێدا ژیان دەستپێكا ژیانێ یە بۆ وان، چەندین بەرپرسایەتی دكەڤنە سەر ملێن وان، دڤێن ژیانا خوە ئاڤا بكەن، هەڤژینییێ پێك بینین، ببنە خودان خێزان، ببنە خودان خانی و ببنە خودان پرۆژەیێن خوە و ئەڤێن هەنێ هەمی ب دەلیڤێن كاری ڤە گرێداییە و لێ دەما كاركرن نەبیت، شوینا ئەڤ ھێزا گەنجی یا مفادار بیت و ئایندەكی بۆ گەنجی دروست بكەت، دێ بیتە بارگرانی ل سەر مالباتا خوە و دێ هەست كەت وی شیانێن تشتەكی نینن بۆ مالا خوە پێشكێش بكەت و دێ دەست ب ھزرێن نەرێنی كەت و تەفكیرا وی هەمی دێ بۆ تشتێن سلبی چیت و دێ بۆ بنە نەخوشی و دەما نەشێت پێدڤیێن خوە یێن دەستپێكی ژی بدەستڤە بینیت، دێ بزاڤێ كەت خوە ژ هەر تشتی دویر بگریت، تێكەلییێ دگەل دەوروبەرێن خوە، كەسەكێ ئەكتیڤ نابیت، نەشێت كارێن رۆژانە بكەت ئەگەر ئەو كارێن هەنێ چەند د سڤك ژی بن، دێ بینی تێكەلیێن وی دگەل تاكێن خێزانێ ژی تێكەلیێن نە دروستن، رێزگرتن یا كێمە، دێ ئەڤ گەنجێ هەنێ خوە ژ بەرپرساتییا دویر گریت و یا ژهەمیێ ژی مەترسیدارتر ل سەر دەروونێ گەنجی، ئەڤە گەنجە دێ ل ھندەك پەیوەندییان گەرییت خوە پێ ژبیرڤەكەت و خوە ژ جڤاكی دویر بكەت و دێ هەڤالێن خراب گریت، ژبەركو ئەو هەڤالێن خراب هەمان كەسن وەك وی كەفتینە بن جورەكێ نەخوشییێ و خەموكییێ و دێ بەرەڤ كافییا چیت ئەگەر كور بیت و رەنگە یا ژڤێ خرابتر بەرەڤ بكارئینانا ماددێن هوشبەر ڤە بچت و بوویە دڤێت حكومەت و لایەنێن پەیوەندیدار ل رێگەچارەیان بگەرن، دەلڤیێن كاری دروست بكەن و كارئاسانییان دروست بكەت برێكا كومپانیا و كەرتێ تایبەت، چ ب كێمكرنا باجێ بیت ل سەر وان یان هەر رێكەكا دی بیت، گرنگ ئەو دەلیڤێن كاری زێدە بكەن و گەنجان بكار بێخن و ژ گەنجەكێ دەروون نەخوش، بكەنە گەنجەكێ ئاڤاكەر.
