ئیسماعیل هاجانی
وێ ســـپێدا زوو بـــــەرێ تە ل پایتەختی بوو، دەمێ تو ژ مال دەركەتی دوو دلیەك ل جەم تە هەبوو، ژ خوەی نەی ب ئاڤنهە بووی، بگەهییە فرۆكا خوە. لەو تو ب لەز ل ترومپێلێ دخوری، پشتی گەهشتییە سەرێ باژێری؛ ترافیكا دوویێ نە یا ئێكێ، كچەكا سنێلە د گەل سۆربوونا گۆلۆپێ، هێژ تو باش نە راوەستای، وێ گولەكا سۆر هاڤێتە سەر دەشبۆلێ ترومپێلێ. تە ژی هندەك پارە كرنە د دەستی دا، تە ب كەنیڤە گۆتێ: من كەس نینە ڤێ گولێ سەرێ ڤێ سۆبێ پێشكێش بكم، نازدارێ ب بشكورینەكە شرین گۆت؛ ئەڤرۆكە رۆژا عاشقانە ژ خوە یێن د تەمەنێ تە دا خودان ژن و هەڤال و دەزگرن. د گەل گۆتنا وێ گۆلۆپ كەسك بوو، د رێ دا تە بۆ خوە گۆت: ئەڤ قیزكە ل ڤێ دووریانێ فێری گەلەك تشتان بوویە، خودێ دزانت كا رۆژێ چەند سەرحوجێن زك مەزن دبەررە دبورن. پشتی تە ترومبێل پارك كری، ئەو گولە ما بوو د دەستێ تە دا، دەمێ ل بەر دەرێ فرۆكەخانێ، چاڤێن تە ب كرێكارەكێ رەش ئەسمەر كەتین كارێ پاقژیێ دكت، تو هێدی بەر پێ چووی و ئەو گولە پێشكێشكر و گۆتێ ڤێ سۆبێ كەسەك ژ تە پێڤەتر هێژای ڤێ گولێ نینە.
