م. ئیمان نەزیر
یا باشتر ئەوە فرۆشیار بخوە هەر ژن بن، ژبەرکو گەلەک ژ وان پێدڤی و كەرەستەیان یێن دھێنە پیشاندان، تایبەتن ب ژنان بخوڤە و ئەو پتر دشێن دئێک دوو بگەهن و سەرەدەریێ دگەل ئێک بکەن و ئاسانکارییێ ژی بکەن.
کارکرنا ژنان د کەرتێ تایبەتدا و هەبوونا وێ دناڤ بازاری و جھێن گشتیدا، گرنگیا خو یا تایبەت ژ گەلەك ئالیانڤە یا هەی. ئارمانج ژێ، پەیداکرنا ئابوریەکێ سەربەخویە و گرنگی پێدانە ب شیانێن خو یێن تاکە کەسێ، بۆ برێڤەبرنا خێزانا خو و پەیداكرنا داھاتەكی بۆ خۆشگوزەرانییا وێ خێزانێ یا ئەو دناڤدا دیت. گرنگیا كاركرنا ژنان دکەرتێ تایبەتدا، نەبتنێ بۆ پێشکەفتنا ئابورییە، بەلکو بۆ دروستکرنا کومەلگەهەکا پێشکەفتیترە، چ كاركرنا وێ ل بازاری یان دکانێن جلوبەرگ و قوماشی یان جوانكاریێ یان فرۆشتن و دروستكرنا کەرەستێن جوانکاریێ بیت ......هتد. کارکرنا وێ دڤان بیاڤێن جودا جودا، گەلەکا پێدڤی یە، ژبەرکو پتریا بکران ژن بخوەنە، ئەڤجا یا باشتر ئەوە فرۆشیار بخوە هەر ژن بن، ژبەرکو گەلەک ژ وان پێدڤی و كەرەستەیان یێن دھێنە پیشاندان، تایبەتن ب ژنان بخوڤە و ئەو پتر دشێن دئێک دوو بگەهن و سەرەدەریێ دگەل ئێک بکەن و ئاسانکارییێ ژی بکەن و ژبەر ڤێ چەندێ، زوربەی جاران ژنێن بکر حەزا هندێ هەیە، قەستا وان جهان بکەن ئەو جهێن ژن بخوە لێ کاردکەن.
بێگومان کارکرنا وێ د کەرتێ تایبەتدا، یا ب ساناهی نینە و لێ یا ب زەحمەت ژی نینە، یا گرنگ شکاندنا بەربەستانە و گەهشتنە ب ئارمانجێ، ژبەرکو د سەردەمێ نوکەدا ژیان یا بزەحمەت کەفتی، ژنان ژی پێدڤی ب داهاتەکێ هەیە و دشێت مل ب ملێ هەڤژینێ خوە، دوو ژێدەرێن داھاتی هەبن و دێ خۆشگوزەرانیا وان خۆشتر بیت و ژیانا وان دێ یا بێ كێموكاسی بیت. سەرەرای ئاستەنگێن گومەلگەهی و دابونەریتان، كو هەتا نوکە ژی هندەک گومەلگەه بۆچوونێن نەرێنی هەنە دەربارەی کارکرنا وێ. لێ خۆشبەختانە د سالێن نوکەدا بەرارورد ب سالانێن چووی، دەرفەتا کارکرنا وێ پتر بەرەف گەشەکرنێ ڤە چویە. ئەڤ هەولدانە ژی بو حکومەتا هەرێمێ و رێکخراوێن ژنان و کومەلگەهێن مەدەنی ڤەدگەریت، کو رۆلەکێ بەرچاڤ بۆ پاراستنا مافێن وێ دگێرن، هەتا بوویە ئەگەرەک، ژن هەست ب هەبوون ھێز و گرنگیا خوە دناڤ جڤاکیدا بکەت.
