سەردار هێتوتی
ب بڕیارەکا سیاسی، مۆچەیێ وەڵاتیێن کوردستانی ل بەغدا دهێتە راوەستاندن و پشتی ڤێ راوەستاندنێ، ئێدی دەرگەهـ بۆ فشارێن مەزن لسەر مێشکێ خەلکی ڤەدبن، مانێ خەلک یێ فێری ماسی خارنێ هاتیەکرن و نەهاتیە فێرکرن چاوا ماسییا بگریت.
ژبەر فشارێن مەزن یێن ڤان سالێت بووری ل سەر جڤاکی، دەڤێ هەمیا ب گازندە کەفتیە، گازندێن وان ژ عەردی هەتا بەژنا دوو عەسمانان بلند دبن. گلەیێ ژ خەلکی ناکەین ژبەر فشارێن لسەر دەروونێ وان، چونکی نەداری و نەخۆشی، هەمی تشتا ب سەرێ مرۆڤی دئینن. ب بڕیارەکا سیاسی، مۆچەیێ وەڵاتیێن کوردستانی ل بەغدا دهێتە راوەستاندن و پشتی ڤێ راوەستاندنێ، ئێدی دەرگەهـ بۆ فشارێن مەزن لسەر مێشکێ خەلکی ڤەدبن، مانێ خەلک یێ فێری ماسی خارنێ هاتیەکرن و نەهاتیە فێرکرن چاوا ماسییا بگریت.
دبێژن: جارەکێ حەزا هونەری خۆ لسەرێ گەنجەکی دابوو، ئەو گەنج رێیەکا دیر و درێژ دگریتەبەر هەتا دگەهیتە لایێ مامۆستایەکی و دا لبەر دەستێ وی فێری کێشانا نیگارا ببیت، ب سالان گەنجێ حەزژێکەرێ نیگارکێشانێ دمینتە لایێ مامۆستایێ خۆ، هەتا فێری هەمی تەکنیکێن هونەری دبیت، ئینا مامۆستایێ وی رۆژەکێ ژ رۆژا دبێژیتە قوتابیێ خۆ: تۆ دشێی ژ نهۆ پاش ڤەگەری مال، ئێدی تۆ هونەرمەندی، ئەو تشتێ من زانی هەمی من گەهاندە تە. قوتابی ژی هزرێت خۆ د گۆتنا مامۆستایێ خۆدا دکەت و دەست ددەتە فرچێ وێنەکێشانێ و ب دلێ خۆ وێنەکی دکێشیت و تابلۆیا وی دبەتە جهەکێ قەرەبالغ دادنیت و داخازێ ژ وان کەسا دکەت یێن سەحدکەنە وێنەی و دبێژیتێ: هەر کەسێ ژ وە تێبینیەک یان رەخنەیەک لسەر خالەکا وێنەی هەبیت، ب دانانا نیشانا (×) وی جهی دیاربکەن. ئێڤاری دەما قوتابی ڤەدگەریت دا تابلۆیا خۆ بینیت و ل وی جهی راکەت، دبینیت یا پرە ژ نیشانێن (×)، د دلێ خۆدا توورە دبیت و ڤەدگەریتە مال ل نیک مامۆستایێ خۆ، و ئەوا چێبووی هەمیێ بۆ ڤەدگێریت. مامۆستا داخازێ ژ قوتابیێ خۆ دکەت، و دبێژیتێ: تۆ دشێی دووبارە هەمان وێنە بۆ من بکێشی، قوتابی ژی بێی دوو دلی دەست ددەتە کێشانا هەمان وێنە. رۆژا پاشتر مامۆستا تابلۆیێ دگەل خۆ دبەت و ل جهێ رۆژا بەری هنگی ددانیت، لێ ڤێجارێ فرچە و رەنگان ژی دگەل دبەت و داخازێ ژ بینەرێن وێنەیێ دکەت هەر جهەکێ تێبینی لسەر هەبیت، بلا بۆ مە سەر راست بکەن.ئێڤاری دەما دگەل قوتابیێ خۆ ڤەدگەریت، دبینیت، چ نیشان و دەستکاری د وێنەیی دا نەهاتینەکرن.
مامۆستا ل قوتابی ڤەدگەریت و دبێژیتێ: زۆرن ئەوێ رەخنێ دگرن، رەخنەگرتن زۆر یا هێسانە، لێ چارەسەری زۆر یا ب زەحمەت، ئەو ل ملێت هەمی کەسا ناهێت. ئەم ژی دبێژین: دا دەستا ژ گازندەیان بەردەین و ل خالێن چارەسەریێ بگەرین.
