راپۆرت: بادینان
سالا پار و دروست ل رۆژا ئێكی هەیڤا نیسانێ ل دەمژمێر چاری سپێدێ، ئاگرەكێ مەزن ب دكانێن بازارێ چەلێ ل دهۆكێ دكەڤیت و تێدا (100) دكان و (25) كوگەھـ هاتنە سوتنێ. لدوور ڤێ روویدانێ و هاریكاریكرنا زیانڤێكەفتیان، كارگێڕیا پارێزگەها دهۆكێ ژی ددەمێ خوەدا سوز ب واندا، كو بهێنە قەرەبووكرن و بۆ ڤێ چەندێ لیژنەیەك پێكئینا، ژبۆ زانینا قەبارێ زیانێن هەر دكانەكێ. پشتی دەربازبوونا سالەكێ ژی ژڤێ روویدانا ئاگركەفتنێ، هێشتا ھندەك دكاندار گازندێ دكەن كو وەكو پێدڤی نەهاتینە قەرەبووكرن دبێژن: زیانێن مە گەلەك مەزنتر بوون ژ ئەوا ئەم پێ هاتینە قەرەبووكرن و ل دەمێ روویدانێ كو بەریا جەژنێ بوو و بۆ جەژنێ مە هەمی ئامادەكاریێن خوە كربوون و هەر چ ددەستێ مەدا هەیە مە بۆ جەژنێ كربوو د(جل و بەرگان)را، لێ روویدانا ئاگر كەفتنێ هەمی تشتەكێ مە دگەل خوە بر رەژی ل جهێ وێ هێلا و زیانێن مەزن بمە گەهاندن و گەلەك دكاندار نەشیان قەرێ خوە بدەن.
جهێ ئاماژێ یە كو بازارێ چەلێ ئێك ژ بازارێن مللییە ل دهۆكێ و هەمی دەمان یێ ب قەرەبالغە و بكرێن زێدە قەست دكەنێ و بەری رویدانا ئاگر بەربوونێ، خودانێن ڤان دكانان، هەر پارێ هەیی كربوونە د جلوبەرگێن جەژنێدا و لهیڤییا قازانجەكی بوون، لێ وان نەزانی كو شورەتەكێ كارەبێ دێ ڤی قازانجی دگەل خوە بەت و دێ وان قەردار كەت و زیانێن مەزن گەهینتە وان، كو ژین و ژیارا خێزانێن وان ل سەر وان دكانان بوو.
