خانەقی - تایبەت
وەزارەتی شارەوانی و نیشتەجێكردنی عیراق جەختدەكاتەوە، پردی حەمرین بەشی زۆری تەواوبووە و بە ئەگەری زۆرەوە ئەمساڵ تەواودەبێت و دەخرێتە خزمەتی هاووڵاتیانەوە.
بەوتەی ئەو وەزارەتە پردەکە بە یەكێك لە گرنگترین و گەورەترین پردەكانی عێراق دادەنرێت و درێژییەکەی (7750) مەترە.
شێخ ئەحمەد زەرگۆشی بەڕێوبەری ناحیەی سەعدیە بە دووتوێی كوردستانی نوێی خانەقی وت: پڕۆژەكە بە سەرپەرشتی بەشی ڕێگاوبان و پردەكانی وەزارەت جێبەجێ دەكرێت و بە پڕۆژەیەكی بەرچاو دادەنرێت بەوپێیەی پارێزگاكانی ناوەڕاست و باشوور بە پارێزگاكانی باكوورەوە دەبەستێتەوە و بە پارێزگای دیالەدا تێدەپەڕێت.
هەروەها پردی سەرەكیی بازرگانی و هاتوچۆی سەرنشینانە لە نێوان عێراق و ئێراندا، لە رێگەی دەروازەی سنووریی مونزیرییەوە.
ئاماژەشی بەوەدا کە پردەكە لەسەر (376) پایە وەستاوە و كاریگەریی باشی دەبێت لەسەر كەمكردنەوەی كاتی هاتوچۆی هاووڵاتیان و سەلامەتییان دەپارێزرێت بە بەراورد بە رێگە كۆنەكە.
نووسینگەی ئەو وەزارەتە ئەوەشی ئاشكراكردوە، کە كۆمپانیای ستراكۆی لوبنانی پڕۆژەکە بە بڕی 62 ملیار و 600 ملیۆن دینار جێبەجێ دەکات.
