ئاكرێ، بەرهەمێ پەنیری كێمبوویە و باران ئەگەرن

ئا: رەڤین 

قەزا ئاكرێ ب ژێدەرێ پەنیری دهێتە ناسكرن، نە بتنێ بۆ باژێرێ دھۆكێ و دەوروبەران بەلكو تا هەولێرێ و سلێمانیێ ژی قەست دكەنێ، ئەڤە ژبەر گوند و دەڤەرێن سەر ب ئاكرێ ڤە و هەبوونا چەروانەكێ باش و جهەكێ گونجایی و لدویڤ ئامارێن رێڤەبەریا چاندنێ ل ئاكرێ، لدوورێن (600) ھزار سەرێ ئاژەلی ل سنوۆێ وێ قەزایێ هەیە و ئەڤ رێژە دگەھیتە 40% یا هەمی پارێزگەها دھۆكێ. دكاندارەك ل ئاكرێ ژی نەبوونا پەنیری ئەڤ سالە بۆ نەهاتنا بارانان دزڤرینیت و دبێژیت: «ئەڤ سالە پەنیر گەلەك بكێمی دهێتە دناڤ بازاریدا و هەر سال ب پیكەمان دهات، لێ ئەڤ سالە ب كیلویان». ڤی دكانداری زێدەتر دیاركر و گوت: «ئەڤ پەنیرێ دهاتە ناڤ بازاری زێدەتر ژ دەڤەرا دینارتە و وان جهان دهات و ئەگەر ل پار سال خێزانەكێ 50 كیلویێن پەنیری بەرهەمئینابانە، ئەڤ سالە هەمان خێزان ب زوری بگەھینتە 20 تا 25 كیلویان و پار رۆژانە نزیكی 500 كیلویێن پەنیری بەردەوام دگەھشتن و داخوازیەكا باش ل سەر هەبوو و بكرێن مە ژ دھۆكێ و هەولێرێ و سلێمانیێ ژی دهاتن، ئەڤە ژی ژبەركو پەنیرێ ئاكرێ پەنیرەكێ پاقژ و كوالیتەكا باش هەیە».