عەبدولڕەحمان بامەڕنی
دڤی دەمێ بوریدا، دیتنێن جودا لدوور بریارا چەكدانانا پەكەكێ دەركەفتن و ھندەكان ب بریارەكا باش زانین و ھندەكێن دی ب خوەكوژیێ زانین و ھندەكان ژی نەشیان خوە ئێك لابكەن و بتنێ پرسیار دهاڤێژتنە دناڤ سوشیال میدیایێدا و ل ھیڤیا كومێنتان دمان، هەر چ نەبیت خوە پشت راست بكەن كا ئایا بریارەكا دروست بوو یان خوە كوژی بوو؟! ئەز ژی دڤێ گوتارا كورتدا نەدبێژم بریارەكا دروست بوو و نە ژی دبێژم بریارەكا شاش بوو هاتییە هاڤێتن، لێ ھندەك ئاماژە هەنە و ل هەمیان ژی دیار دبیت، كو دێ پێنگاڤەكا باش بیت، نەبتنێ بۆ كوردێن باكورێ كوردستانێ و پێڤاژوویا ئاشتییێ ل وێ پارچێ، بەلكو دێ كاریگەریا وێ ل سەر رۆژئاڤایێ كوردستانێ و باشوورێ كوردستانێ ژی هەبیت.
ئەگەر ل خەباتا چەكداریا كوردان ژی بنێرین ددەمێن بوریدا، تا سەد سالێن دەرباز بووی ژی، مە كوردان بەرخوەدان یا كری، چەكێ مە و تڤەنگا مە ل ملێ مەبوویە و مە شەھید و قوربانی داینە، گوندێن مە هاتینە سوتن و سەدان دەردەسەری و كومكۆژی ب سەرێ مە هاتینە و لێ ئایا مە شیایە دوی دەمی هەمیێدا سیاسەتەكا دروست بكەین؟ ئەگەر بەراوردیێ ژی بكەین، ئایا دڤی دەمی بوری هەمیێدا، زیانێن مە زێدەتربوون یان دەستكەفتیێن مە؟ رەنگە هەبن بێژن، نموونا فیدرالیەت و حكومەت و پەرلەمانی ل باشوورێ كوردستانێ. لێ ئایا ئەڤا ل باشوورێ كوردستانێ ب دەست كوردانڤە هاتی، بەرهەمێ خەباتا چیایی بوویە یان ژ ئەگەرێ پێشهاتێن دەڤەرێ بووینە؟ د لێكدانەكا ھوسادا، ئەز بخوە دبینم چەكدانانا پەكەكێ و گرتنەبەرا سیاسەتێ ژ خەباتا چەكداری، گەلەك د بەرژەوەندیا هەمی پارچەیێن كوردستانێ دایە و تایبەتی ژی ل باكورێ كوردستانێ و هەر چەندە دڤیابا زانكویێن مە ژوورێن لێكدانەڤەیێن ستراتیژی هەبانە چەندین ڤەكۆلین و شرۆڤەكرن بۆ بارۆدوخێ كوردستانێ هەمیێ كربانە، ڤەكۆلین ل سەر (كەفتن و سەركەفتنێن) مە كربانە و هەبانە، نوكە دا مە خواندنێن جودا ل بەر دەست هەبن، هەم حزبێن مە دا ژێ مفادار بن و د حالەتەكێ وەك یێ نوكە یێ پەكەكێدا، ئەگەر بریارا چەكدانانێ سەربگریت یان سەرنەگریت ژی، لێ دا چاڤروونیەك ل سەر بارۆدوخی لدەف هەمیان هەبیت و ل جیهانێ هەمیێ ژی سیاسەت ھوسا دهێتە كرنێ.
