رۆندک بامەرنی/ ئەلمانیا
هێشتا هندەک رحێن هەین، ل سەر دێمێ عەردی خودیکێن زەلالن. نەشێن ژ راستیێ پێڤە ڤەگێرن، نزانن ئەکتەریێ بکەن و پەیڤێن شرین و رەنگکری یێن ڤالا بکاربینن و نەشێن ماسکێن نەخشاندی لبەر دێمێ خۆ بکەن. ئەڤ کەسە ئەوا دبینن و هەست پێدکەن وێ دبێژن و ددەن و دستینن، هەکو ب ڤیان بن، ب مەرداتی ددەن و گەرما وان دیاردبیت، هەکو فرە بایێن نەرم لسەر دلێ وان دبوورن. هەرچەندە ئەو گەلەک دکێمن، لێ ئەو دناڤ خەلکیدا هەست ب ئاشتییێ ناکەن، چنکو هێشتا جیهان وەلێ نەهاتە سەرەدەریێ دگەل پاکیێ و زەلالیا ڤان مرۆڤا بکەت. بەلێ جیهان یا فێری هشیاریێ و یاریێن تاری و پەیڤین پێچایە.
کۆ تۆ مرۆڤەکێ راستگۆبی، ئەوە تۆ راستیێ بێژی هەکو درەو دهێتە گۆتن. برەنگەکێ ئاسایی حەزژێکرنێ بکەی ل وی دەمێ ڤیان ب تێگەهێن مفا وەرگرتنێ و ژ دەستدانێ دهێنە هەلسەنگاندن. دەمێ تۆ هەڤالینیێ ب رح و جان دکەی، ل وی دەمی هەموو کەس هەڤالینیێ ب ئاقلی دکەن. ژ بۆ رێکخستنا پێکهاتێن نە راگەهاندی بۆ هەر پەیوەندیەکێ کاردکەن و نەزندی گازیدکەن؛ «گەلەک خۆ نێزیکی من نەکە، راستیا من ئاشکرا نەکە، زەلالی و راستگۆیا تە ئێمناهیا من تێگددەت!»
هەر جارەکا تۆ فرەکا گەرم ژ رحا خۆ یا راستگۆ ددەیێ، جانێ وان دهەژیێت، هەروەکو زاتێ خۆ یێ ژبیرکری د تەدا دبینن، تۆ پارچەکا کارکەفتی ژ هەستێن وان دواندا رۆهن دکەی و نیشا وان ددەی، ئاها گرێک یا دڤێرێدا، نەکو ئەوە تۆ یێ شاشی، بەلێ راستیەکا نە چاڤلێکری ژوان د دەرئێخی و نیشاددەی، هەستیاریکەکا زێدەیە ژ هێزا وان هێشتا ج جارا راهێنان لسەر رێزگرتنا وێ نەکریە.
تۆ خۆ ڤەدکێشی... بێدەنگ دمینی.. لپشت نەپویتەپێدانەکا سەرڤەیی یا ژ رەنگێ تە نەخۆت و وەکی راستیا تەنەبیت. بەلێ تە ژ «سەرئێشانێ» قورتال دکەت. تۆ بۆ وان دیار دبی مرۆڤەکی گرتی و ڤەشارتی، بەلی یا دروست تۆ مروڤەکێ گەلەک ڤەکری و دیاری و راستگۆی ل پلا ئێشانێ. تۆ دهێیە تاوانبارکرن کۆ تۆ مرۆڤا د هەژینی و ل شەرمێ ددەی، ل وی دەمێ تۆ بتنێ یێ راستگۆ بوویی. تۆ بۆ وان خۆدیک بووی ئەوا تە دواندا دیتی تە بۆ وان ڤەگەراندەڤە، یانکو تۆ خۆدیک بووی و خۆدیک نەیا لێبوورە ژبلی راستیێ چ ناڤەگێریت. هۆسا و بڤی رەنگی راستی دبیتە بارگرانی و دان ژ نیڤا دلی دبیتە گەف، زەلالی دبیتە بارەکێ گران، خۆدانێ دلێ پاک ژخۆ ب شک دکەڤیت، ئەرێ ما یا فەرە ئەز خۆ کێمکەم دا ژمن د رازیبن؟ ئەرێ مانەیا فەرە خۆهاڤێژتنا خۆ یا سرۆشتی کێمکەم داکو ئارامیا خەلکی ب پارێزم. ئەرێ ما بێدەنگی رێکەکا دروستە بۆ مانێ؟ بەلێ راستیا کوور ئەوە تۆ کەسێ نا ئارینی بتنێ تۆ بۆ دیاردکەی راستیا وان.. تۆ کەسێ ناترسینی، بەلێ تۆ تشتەکێ نڤستی د واندا هشیار دکەی.
تۆ دناڤ کۆژیێن ژیانێدا یێ بتنێ نینی، هندەک رحێن دیتر ژی هەنە وەکی تە و پێنگاڤێن خۆ ب نیرهە دهاڤێژن. ئەو بتنێ یێ ل هیڤییێ هندەک کەسێن وەکی خۆ بێ ترس و لەرز راستیا خۆ ئالوگوور بکەن. وەکی خۆ بمینە، زەلالی نە تاوانە، راستگۆیی چەندا بارگران بیت، دێ هەر وان کەسا بخۆ راکێشی، ئەڤێن حەز ژ زەلالیێ دکەن و نەیێن ژێ درەڤن، ئەڤێن زەلالیێ و راستیێ هەمبێز دکەن ب ئاسایی و پاکی و بەرائەت و گەش وەکی دلێ تە.
