دیڤچوون: ڤەژین عیسا
لڤێ دووماھیێ بازارێ ئەلەكترۆنێ لدەف خەلكی یێ دبیتە تشتەكێ ئاسایی و گەلەك كەس پەنایێ دبەنە بەر ڤی جورە بازاری و ئەنترنێتێ دئێخنە دخزمەتا خودا. ئارمانج ژ مالپەرێن تورێن كومەلایەتی، نە بتنێ مژوولكرن و دەم بوراندنێن خەلكییە، بەلكو گەلەك هەلبژارتنێن دی دناڤرا دهێنە دیتنێ، كو مفایێن بازرگانی ژی ژێ بهێنە وەرگرتن و بووینە بازراێن ڤەكری.
من بەلگێن مێوا كرین
دەیكا فەرەشینێ ل دكانەكا فێقی ئامادەبوو و گوتە خودانێ دكانێ ئەز یا لدویڤ تەلەفونا وە هاتیم، من بەلگێن مێوا دڤێن. دەما مە پرسیار ژ خودانێ دكانێ كری؟ گوت: «من ئەڤ سالە بازارەكێ باشێ فرۆشتنا بەلگێن مێوا یا كری، من پەیچەكێ تورا (ئەنسترگرامی و تیك توكی) یێ دروست كری و ئەز تێدا ریكلامێ بۆ بەلگێن مێوان دكەم، تا نوكە ب دەهان كیلو من فرۆشتینە. نوكە چەند خێزانەك ژ گوندێ بریفا و سوریا رۆانە چەند سندوقێن بەلگێن مێوا دئینن و ئەم بۆ دفرۆشین، ئەو سپێدێ دچنە ناڤ رەزێن خوە و بەلگێن مێوا دكەن و دكەنە تەخە و بەلگێن وان دتەرن، ئەز ل مالپەرێ خوە یێ ئەنترنێتێ بلاڤدكەم و خەلك تەلەفونێ بۆ من دكەن و ئەز ناڤۆنیشانێ دكانێ ددەمێ و دهێن دكرن». دەیكا فەرەشینێ ژی گوت: «كێشا مە یا هەر سال دێ چاوان تێرا خوە یا سالێ بەلگێن مێوان پەیدا كەین و ژ نشكەكێڤە مە د تورا تیك توكێ دا ریكلاما ڤان بەلگان دیت، گەلەك دجوان بوون و هەمی كربوونە تە خە و بهایێ وان ژی یێ گونجایە و لدویڤ ناڤۆنیشانێن دكانێ، ئەم یێن هاتین بەلگێن مێوان بكرین.
ئەز چ كرێیان نادەم:
بازارێ ئەلەكترونی، ژ پرۆژێن سەرەكینە لدەف گەلەك گەنجان، (هەلات یا تەمەن 32 سالی)، خودان پرۆژەكێ سەركەفتییە ل سەر تورا ئەنترنێتێ، تایبەتی ژی ل سەر تورا (ئنستگرام) و هەر تشتێ گرێدای كچان و ژنان، جوانكاریێ و كەرەستێن پاقژكرنێ و شووشتنێ، پیشانددەت، گوت: «هەر ژ زارۆكینیا خوە وەرە، من گەلەك حەز ژ ڤی كاری كریە و لدەستپێكێ بتنێ من د بازنێ خێزانێ و هەڤال و كەسوكاراندا كار دكر، بەلێ پووتەدانا خەلكی و پشتەڤانییا وان ل سەر بەردەوامبوونا من، ئەڤە ژبلی كو ئەز برێكێن كلاسیك كاری ناكەم، بەلكو من یا شیایی پەیچەكی بۆ خوە دروست بكەم و بركێن من ژی ئێك دبێژیتە ئێكی و برێكا دلیڤەری ئەز داخوازیێن وان بۆ ناڤونیشانێن وان فرێدكەم و تشتێ خۆش، پێدڤی ناكەت ئەز كرییا دكانێ بدەم و پارە وەرگرتن ژی یا ئاسان كەفتی، برێكا fib ئەز پارا وەردگرم و ئەگەر من داخوازی ل سەر كەرەستەیەكی هەبیت ژی هەر بڤێ رێكێ ئەز داخوازیێن خوە پێشكێش دكەم و پارەی بۆ فرێدكەم و ئەو ب رێكا تەكسییان بۆ من دگەھیننە بەر دەرێ مالێ».
راستگویەكا بەروەخت:
بازاركرنا ئەلەكترونی هەمی گاڤان ب باشی دەرباز نابیت و ڤان مالپەران لایەنێ خوەیێ خراب ژی هەیە، فەوزی جەبار یێ تەمەن 33 سالی سەبارەت ڤان خرابییان، گوت: «ئەز بەرهنگاری هندەك هەلویستان بوویمە د گەل كاركرنا من د ئێك ژ مالپەرێن ئەلەكترونی یێن كەل و پەلان پیشانددەن، كو دگەل پیشاندانا وان دڤێت وان كەل و پەلان بگەهینن ژی، كو داخوازییا من تا گەهشتی دەركەفت جورەكێ كوالیتا وی نەباش و ئەو جارا ئێكی بوو و دووماهیێ ژی كو ئەز مامەلا بازاركرنا ئەلەكترونی بكەم، ژبەر خرابییا كوالیتێ و مامەلا نەشیرین، كو رەد كرین وان جل و بەرگان ڤەگەرینن یان بگوهورن».
بۆ من سیكا دھۆكێ یە:
رێبەر هەمزە گەنجەكێ پەككەفتیە، هەمی تشتێن وێ دڤێن ل باژێرێ وێ بدەست ناكەڤن، زێدەباری دشیانێن ویدا نینە بۆ هەر تشتەكی بهێتە ناڤ بازاری، بەلێ برێكا ڤان مالپەرێن ئەلەكترونی شیایە هەر تشتێ وێ بڤێت بدەست خوە بێخیت، گوت: «هەكو ئەز لڤان پەیچان دنێرم، هەر وەكو ئەز لناڤ سیكا دھۆكێ دگەرم، ئەڤان لاپەران سەرەدانێن من بۆ سیكێ ب مەرەما بازاركرنێ كێمكرینە و پشت بەستنا من یا نوكە، بتنێ ل سەر ڤان مالپەران مایە، ل دووماهیێ ژی بوویە ئاسانترین و بلەزترین رێكار بۆ بدەستڤەئینانا هەر پێدڤییا مرۆڤی بڤێت».
