سامی بنیامێن رێكانی
شێلادزێ ئێك ژ مەزنترین و بەرفرەهترین ناحیەیە ل سەر ئاستێ پارێزگەها دهۆكێ و هەر ژ سالا 1932ێ تا ئەڤرۆكە، رۆژ بۆ رۆژ یا بەرەف پێشكەفتنێ و وەرارێ ڤە دچیتن. هژمارا ئاكنجیێن وێ ب دەور و بەرڤە یا بەرەف زێدەبوونە و ب دەهان ناڤەندێن خواندنێ یێن حكومی و پەیمانگەهێن نەحكومی لێ هەنە و ساڵانە هژمارەكا زۆرا قوتابیێن شێلادزێ ل زانكۆ و پەیمانگەهێن هەرێما كوردستانێ دهێنە وەرگرتن و هند ژێ دبنە خودان باوەرنامێن جودا جودا. ئەڤە هەمی پێدڤی ب راپۆرت و ڤەكولینێن دەرچوونێ دبن و ژێدەر زوی ب زوی ب دەست ناكەڤن، ژبلی ڤێ چەندێ، شێلادزێ خواندەڤانەكێ زۆرێ هەی و هژمارەكا نڤیسكار و رۆژنامەڤان لێ هەنە, ئەڤە هەمی پێدڤی ب وێ چەندێ هەیە كو پێتڤی ب هەبوونا ژێدەران ببن و دەستێ وان ناگەهیتە ناڤەندا پارێزگەهێ یان قەزایێ لەوما نەبوونا چ پەرتووكخانەیێن گشتی دبیتە ئاستەنگ درێكا قوتابی و خواندەڤانان دا, لەوما داخوازێ ژ حكومەتا هەێما كوردستانێ دكەین كو مینا هەر دەڤەرەكا وەكی دەڤەرا شێلادزێ یا بەرفرەه و پری خواندەڤان و رەوشەنبیر كو پەرتووكخانەیەكا گشتی ل ناحیا شێلادزێ ژی بهێتە ڤەكرن داكو خەلكێ وێ بێ بەهر نەبن ژ خواندنا پەرتووكان, ژبلی ڤێ چەندێ دێ هەبوونا پەرتووكخانێ كاریگەری لسەر زێدەبوونا خواندەڤانان ژی هەبیت كو ب رێكا ڤەكرنا خۆل و سمینار و وورك شۆپان كو پتر خەلك قەستا پەرتووكخانێ بكەتن.
