قهرمان عبدالله حمید بەرواری
رۆناهیەکا کێم د کوژیێ کولانەکا ئەڤی باژێریدا، د سەکەراتا مرنێ دابوو. بێهنا بخویریێن سەرهلدانێ، هێشتا د تیکێن دیوارانرا د ئاسێ بوون. چیرۆکێن خەمگین، هێشتا ب دەنگەکێ نزم د چایخانە و مەیخانەیانڤە دهاتنە ڤەگێران، بەلێ کەسێ بەحسێ (یوسف شەریفێ بەڵێندا) نەدکر، ئەو زەڵامێ د سیبەرێدا دژیا. کورێ جوتیارەکی بوو ژ دەوروبەرێن باژێرکێ (تلەعفەر)، بەلێ د سەردەمێ (بەعسیان)دا جل و بەرگەک دکرە بەرخۆ، کو نەیێ وی بوو. گەهەشتە ئەمنا (سەدام)ی، بۆ ئێک ژ وان، نەکۆ حەژ (سەدام)ی دکر، بەلکو حەژ دەستهەلاتێ دکر، دەستهەڵاتێ بتنێ. فێربوو کا دێ چەوا خۆ نێزیک کەت، کا دێ چەوا سیخوریێ کەت، کا دێ چەوا ڕاپۆرتا نڤێسیت بۆ رازیکرنا قراڵێن خۆ ل بەغدا.
پشتی سەرهلدانا ئادارێ، دەمێ هەمی تشت هاتینە گوهورین، بەعس رووخای ل باشوور، یا لوژیکتر ئەوبوو، کو (بەڵێندا) بەرزە ببیت یان بهێتە دادگەهکرن، بەلێ (بەڵێندا)ی باش دزانی کا دێ ل کیژ جهی راوەستیت، دەمێ باروڤە هار دبن.
د رێزێن پێشییێدا نەبوو، یێ دویر ژی نەبوو ژ گوھـ و چڤاتێن هێزا نوی ئەوا کو ل هەڤسەنگییێ دگەریا، پشتی دەمەکی ژ سەرهلدانێ. ئەوی دزانی کو هێشتا رێز ل مروڤێ ب هێز بتنێ دهێتەگرتن، هەتا هەکە خۆ بەرمایکێن رابردوویەکێ تاری ژی ڤێ مابن.
ژ پلەیێن بچویک دەستپێکر، هەتا کو گەهشتیە پلەیەکا کارگێری یا هەستیار، د دەزگەهەکێ رەوشەنبیری و راگەهاندنێدا. جهەکە کو گومانێ دروست ناکەت سەبارەت وی، بەلێ جهەکێ نموونەیی یە بۆ کوشتنا خەونان.
ئها، ل ڤێرە شیانێن وی یێن راستەقینە دێ دیاربن: بەرهاڤێتنا هێڤی و ئۆمێدان. ئەوى گەنجێن هوزانڤان داخواز دکرن، هەروەسا نڤێسەر، هونەرمەند. ل دویڤدا ب مرۆڤێن (سەرڤەسەرڤە) یان (دویر ژ راستی و کەتوارێ ژیانێ) ل قەلەمددان، رێک نەددا کارێن وان بەڵاڤ ببن، گەلەکێ شارەزابوو د ئاخفتنا وەکو ئاخفتنا رەخنەگرێن ئەدەبیدا، بەلێ دبن تایێن وێڤە ژەهرەکا کوژەک هەبوو.
هەر گەنجەکێ خودان هێڤی با و هەستەکا نەتەوەیی یا ب هێز ڤێ هەبا، یەکسەر رەدکرنەکا بێدەنگ پێ دهاتەدان، دهاتە قەدەغەکرن ژ گەشتکرنێ، ژ فیستەڤالا دهاتە دویرکرن.
دەمێ ئێکی پرسیار ژێ کربا:
بوچی تۆ پشتەڤانیا زمان و شیانێن کوردی ناکەی؟
(بەڵێندا)ی، ئەڤ بەرسڤە ڤێ بوو:
ـ ئەز ل رەسەنایەتیێ دگەرهم، نەک درویشم و گوتارێن ڤاڵە (ب گرنژینڤە ئەڤ چەندە دگوت).
مخابن دبن ئەڤێ گرنژینێڤە، ئۆرگازمەکا کەڤنار هەبوو بۆ کونترۆلکرنێ، ئەو ئۆرگازما فێربوویێ دەمێ ل ئەمنا کەڤن د زینداناندا فێربووی و خوشی پێ دبر، تەماشە دکر چەوا کورد ب دەستێ کوردی دهێتە شکاندن.
رۆژ ب رۆژێ، دەنگ بلند بوون:
- بوچی هەر پرۆژەیەکێ جوانێ بێهنا کوردایەتی و نەتەوایەتیێ ژێ دهێت، دهێتە ژناڤبرن؟
- بوچی رەوشەنبیرێ پاقژ دهێتە کپکرن؟
- بوچی ل هەمی فیستەڤاڵا، هەمان ناڤ و سەر و چاڤ و بچم دهێنە دوبارەکرن؟
د ناڤ ئەڤان پرسیاراندا، د شەڤەکا پڕی باکوزیرکدا (بەڵێندا) بەرزەبوو، چ گور بۆ نەهاتنە ب ناڤکرن، چ وێنە بۆ نەهاتنە هەلاویستن، بەلێ سیبەرا وی هەر ما، هەوەکو نەفرەتا بەعسییان کەلەخەکێ دی بۆ خۆ دیت، ژ نڤێسینگەهێ بۆ ئێکا دیتر، ژ پرۆژەكی بۆ پروژەیەکێ دیتر، ژ کوشتنا هێڤی یەکێ بۆ ئێکا دیتر ب ناڤێ رێکخستنێ، بۆ شکاندنا خەونان بناڤێ راستی و کەتوارێ ژیانێ، ل ڤێرە ئەرێ کی فێربوو، کو ( مەزنترین دوژمنێ مللەتێ کورد، هندەک جاران خۆ دبن پوستەرێن کوردایەتیێ دا ڤەدشێرن)؟
