نڤیسین: بامەرنی
هەر پەرتووكەكا دەركەڤیت، ئێكەم تشت بەرگێ پەرتووكێ و ناڤونیشانێ پەرتووكێ و ناڤێ نڤیسەری سەرنجا مرۆڤی بۆ خوە رادكێشیت، ئەڤ هەر سێ خالێن هەنێ ژی ئەگەرن كانێ مرۆڤی دەست ب ناڤەرۆكا پەرتووكێ بكەت یان نە! سەبارەت بەرگێ پەرتووكا ناڤبری، هەلبژارتنا رەنگێ سورێ تاری و هەبوونا قونتاغێ تڤەنگێ ل سەر ملێ پێشمەرەیەكی و ل پشت ئالایێ كوردستانا مەزن دیاردكەت، سەرنجا مرۆڤی بۆ قوناغەكا دەستنیشانكری یا خەباتا چیایی رادكێشیت، تایبەت ئەگەر مرۆڤ لێكدانەكێ دناڤبەرا ناڤۆنیشانێ پەرتووكێ و بەرگی دا بكەت، كو ناڤێ پەرتووكێ ب دیزاینەكا جوان هاتیە هەلبژارتن، ئەو ژی شۆرەشەك ژ هەلەموورا شۆرەشەكێ، وەك ئەم دزانین، هەلەموور ب رامانا تێھنا دهێت، یان كو بەری نۆكە شوونەوارێن ئاگرەكێ یان گەرماتییەكێ هەبووینە و دەما ئەو ئاگر و گەرماتیا هەنێ بەرەڤ كزبوونێ ڤە چووی و بەری ڤەمریت، دەستپێكەكا دی ل سەر دروست بوویە و رێك نڤیسەرێ پەرتووكێ ژی بڤێ مەبەستێ تێگەهێ هەلەموور بۆ ناڤۆنیشانێ پەرتووكا خوە هەلبژارتییە، ئەو ژی دەستپێكا شورەشا نوویا كوردستانێ بوویە، كو پشتی سالەكێ ژ دامەزراندنا یەكێتی نیشتیمانی كوردستان ئێكەم چریسكا شورەشا نوی سەرھلدایە و پەرتووك بەحسا كاروانێ (38) شۆرەشگێران دكەت، ئەڤ شۆرەشگێرە ژی ژ پێشەنگێن پێشمەرگەی ب سەركێشیا شەھید برەھیم عەزۆی دەستپێكر و ئالایێ شۆرەشا نوی بلند راكرن، ژ قامشلۆ دەركەفتن و بەرەڤ دەڤەرا بەھدینان ڤە هاتن.
د پەرتووكێ دا چەندین تەوەر دكەڤنە بەرچاڤ، بۆ نموونە: دەستپێكێن دامەزراندنا ئێكەتی نیشتمانی كوردستان ل سوریێ و چەوان كۆمێن وەلاتی و كادر و پێشمەرگەیان پەیوەندی پێ دكر، چەوا دەستەیا چەكدار هاتە بەرهەڤكرن، چەوا ئەندامێن وێ ل دیمەشق و قامشلۆ هاتنە مەشقدان و كەنگی و چەوا دەستە بۆ چوار دەستەیێن بچویك هاتە لێكڤەكرن و ل چوار جهێن دەڤەرا بادینان هاتنە بەلاڤەكرن.
پەرتووك ژ نڤیسینا نڤیسەر (بلند شالی) یە و دانا كوردی ژلایێ (محسن عەبدلرەحمان)ڤە هاتیە كوردیكرن. ب بەرگەكێ ناڤین و 130 لاپەران، ژلایێ مەكتەبا راگەهاندن و ھۆشیاری ـ بۆردێ ھۆشیاریڤە هاتیە چاپكرنێ.
نڤیسەری پێشەكیەك بۆ پەرتووكێ نڤیسی یە و د پەرەگرافەكێ وێدا دبێژیت: « یەكێتی نیشتمانی كوردستان د سەختترین و نەخۆشترین دەمدا هاتە دامەزراندن، د دەمەكی دا نەدۆستەكی و نەدوژمنەكی باوەر نەدكر، كو كورد دشێن دەهـ شەڕكەران بهنێرنە چیا، بتایبەت پشتی هەلوەشیانا نشكاڤەیی یا شۆڕەشا ئیلۆنێ و ب شێوەیەكێ نەچاڤەرێكری، كەسێ ژی هزر نەدكر كو مام جەلال تالەبانی سیاسی و پێشمەرگە و مافپەروەر و دپلۆماسیێ دێرینێ كورد دگەل ژمارەكا هەڤالێن خۆ دێ شێن رێكخستنەكا حزبی یا سیاسی یا بەرفرەه دامەزرینن، كو چەندین حزب و كۆمێن سیاسی و لەشكەری د دەمەكێ كورت دا ب خۆڤە دگریت، تاكو دۆستێن وی ژ كورد و ئەرەبان ژی حێبەتیبوون ژ وێرەكی و پێشرەوی یا ڤی زەلامی و بەرسینكگرتنا كاودانێن ئیراقی و هەرێمی و جیهانی، هەروەسا رووبرووبوونا ئاستەنگ و قەبخوازییان».
