دوابەدوای هەوڵەکانی خانمی یەکەمی عیراق بۆ دەستگیرکردنی تۆمەتباری سەرەکیی گرتووخانەی نوگرە سەلمان (عەجاج ئەحمەد حەردان) کە رۆڵێکی زۆر دڕندانە و بکوژانەی هەبووە لەگەڵ ئەنفالكراوەكانى گرتووخانەکە و کەسوکارەکانیاندا، و پاش دادگاييكردن و سزادانى (عەلی حەسەن مەجید) و پێنج گەوره بەرپرسى ديكەى تاوانى ئەنفال لەلايەن دادگاى باڵای تاوانەكانی عیراق له ساڵى ٢٠٠٦ و ٢٠٠٧، دۆسێیەکی سەربەخۆ بۆ چەندین تۆمەتباری تاوانى ئەنفال كرايەوە كه (عەجاج) يەكێك بوو لەو داواكراوانە.
لە ئێستادا و لەم قۆناغەدا پێویستە سکاڵا و وتەی هەموو ئەو کەسانەی کە شاهیدی کارەکانی ئەم تۆمەتبارەن تۆمار بکرێت. وەک ئەرکێکی نیشتمانی و بە مەبەستی کەمکردنەوەی بارگرانیی سەر شانی سکاڵاکارانی دۆسێی ناوبراو لەڕێگەی تیمێکی تایبەتەوە کاری کۆکردنەوەی بەڵگەکان و وەرگرتنی وتەی شاهیدەکان بە ئەنجام دەگەیەنرێت بە مەبەستی ئامادەکردنیان بۆ دادگا و تەواوکردنی رێکارە یاساییەکان.
داواکارین هەموو ئەو کەسانەی کە شاهیدی کارەکانی ئەم تۆمەتبارەن سەردانی ئەو ناونیشانانەی لای خوارەوە بکەن لەو کاتانەی دیاریکراوە و بەڵگەنامەی یاسایی پێویست لەگەڵ خۆیاندا بهێنن.
ناونیشانەکان:
-سلێمانی (مۆزەخانەی نیشتمانی ئەمنەسورەکە)
-کەلار (بەڕێوەبەرایەتی گشتی شەهیدانی گەرمیان)
-چەمچەماڵ (مۆنۆمێنتی ئەنفال)
لەڕۆژی دووشەممە ٢٠٢٥/٨/٤
تا ڕۆژی شەممە ٢٠٢٥/٨/٩
لە سەعات ٩ی سەرلەبەیانی تا ١٢ی نیوەڕۆ
نووسینگەی خانمی یەکەمی عیراق
