لە لووتکەی ئەلاسکا، سەرۆکی روسیا ڤلادیمیر پوتین و سەرۆکی ئەمریکا دۆناڵد ترەمپ بە ئامانجی جیاوازەوە کۆدەبنەوە بۆ گفتوگۆکردن لەسەر کۆتاییهێنان بە جەنگی ئۆکرانیا.
پوتین دەیەوێت ئەم کۆبوونەوەیە وەک دانپێدانانێکی نێودەوڵەتی بەکاربهێنێت، کە نیشانەی شکستی هەوڵەکانی رۆژئاوایە بۆ گۆشەگیرکردنی.
شوێنی لووتکەکە لە ئەلاسکا، کە لە رووی مێژوویی و جوگرافییەوە گرنگی هەیە، وەک پەیامێکی سیمبولی بەکاردەهێنرێت بۆ پاساودانی گۆڕینی زۆرەملێی سنوورەکان.
ئامانجی سەرەکیی پوتین بەدەستهێنانی سەرکەوتنە لە رێگەی چەسپاندنی دەسەڵاتی روسیا بەسەر هەرێمە داگیرکراوەکانی ئۆکرانیا. کرملین هەوڵ دەدات پشتیوانیی ترەمپ بۆ داواکارییەکانی بەدەست بهێنێت، بەو هیوایەی کە ئەگەر ئۆکرانیا رەتی بکاتەوە، ترەمپ پشتگیرییەکانی بۆ کیێڤ بوەستێنێت.
لەگەڵ ئەوەشدا، فشارە ئابوورییەکانی سەر روسیا لەوانەیە پاڵنەرێک بێت بۆ سازشکردن، هەرچەندە تا ئێستا هیچ نیشانەیەک بۆ ئەمە نییە.
لەلایەکی ترەوە، دۆناڵد ترەمپ، کە هەمیشە ویستویەتی وەک "ئاشتیخوازێک" دەربکەوێت و خەونی بە خەڵاتی نۆبڵی ئاشتییەوە بینیوە، ئەم لووتکەیە بە دەرفەتێک دەزانێت بۆ جێبەجێکردنی بەڵێنەکەی. سەرەڕای لێدوانە دژبەیەکەکانی و گۆڕینی هەڵوێستەکانی، ترەمپ بە ئاشکرا ئارەزووی خۆی بۆ کۆتاییهێنان بە جەنگەکە نیشان داوە.
هەرچەندە ئاستی چاوەڕوانییەکانی بۆ ئەم کۆبوونەوەیە هێناوەتە خوارەوە و بە "دانیشتنێکی گوێگرتن" ناوی بردووە، بەڵام هێشتا بەدوای دەرفەتێکدایە بۆ ئەوەی بانگەشەی پێشکەوتن بەرەو ئاشتی بکات.
شارەزایان پێیان وایە پوتین، وەک دانوستانکارێکی زیرەک، لەوانەیە رێگەیەک بدۆزێتەوە کە ترەمپ بتوانێت بانگەشەی سەرکەوتن بکات، بەڵام بێگومان بە مەرجەکانی روسیا.
سەرچاوە BBC
