فرۆشتنی ئەلاسکا لەلایەن روسیاوە بە ئەمریکا لە 158 ساڵ لەمەوبەر، دەرەنجامی شکستی سەربازی و ترسی جیۆپۆلەتیکی بوو. روسیا کە لە جەنگی کریمەدا (1853-1856) بەسەختی لاواز ببوو، ترسی ئەوەی هەبوو بەریتانیا لە رێگەی کەنەداوە دەست بەسەر ئەو خاکە فراوانەدا بگرێت، بۆیە لە بەرامبەر بڕی 7.2 ملیۆن دۆلاردا بە ویلایەتە یەکگرتووەکانی ئەمریکای فرۆشت.
سەرەتای دەستپێشخەرییەکانی روسیا بۆ ئەلاسکا دەگەڕێتەوە بۆ ساڵی 1725، کاتێک چاوی لە سامانە سروشتییەکانی بوو، بەتایبەتی پێستەی گرانبەهای سەگی دەریایی. بەڵام دووریی ئەلاسکا لە پایتەخت، کەشوهەوای سەخت، کێشەی دابینکردنی پێداویستی و رکابەریی بەردەوامی ئەمریکا، بەڕێوەبردنی ناوچەکەی بۆ روسەکان ئەستەم کردبوو.
ئێستا، دوای زیاتر لە سەدەیەک و نیو، هەمان ئەو خاکەی کە سەردەمانێک بابەتی مامەڵەیەکی مێژوویی بوو، دەبێتە میوانداری کۆبوونەوەیەکی لوتکەی چارەنووسساز. بڕیارە سەرۆکی ئەمریکا دۆناڵد ترەمپ و سەرۆکی روسیا ڤلادیمیر پوتن لە ئەلاسکا کۆببنەوە بۆ گفتوگۆکردن لەسەر جەنگی ئۆکرانیا.
