د. ئەحمەد حەمەدئەمین
ماهاتما گاندی (2ی تشرینی یەكەمی 1869 – 30ی كانوونی دووەمی 1948)، پارێزەر و سیاسی و سەركردەی رۆحیی بزووتنەوەی رزگاریخوازی هندستان، لە ماوەی ژیانیدا رۆڵی دیار و بەرچاوی لە پرسی ئاشتی و بەیەكەوە ژیان و یەكترقبووڵكردندا بینیوە. لەو چوارچێوەیەدا بە چڕی هەوڵ و كۆششی خستۆتەگەڕ و هەوڵیداوە بیروبۆچوونەكانی بەسەر ژینگەی دەرووبەری و جیهاندا رەنگبداتەوە. لەو سۆنگەیەوە ئەو كتێبانەی باس لە ئاشتی و پێكەوە ژیان دەكەن، نموونە بە هەوڵەكانی ئەو كەڵە مرۆڤە دەهێننەوە و زۆرجاریش بە شانازییەوە باسی دەكەن.
یەكێك لەو كتێبانەی باسی هەوڵەكانی گاندی لەو بوارەدا دەکەن، كتێبی (The Gift of Anger: and other lessons from my Grandfather Mahatma Gandhi)یە، كە ساڵی 2017 لەلایەن ئارون گاندی (14ی نیسانی 1934 – 2ی مایسی 2023) نەوەی گاندی بە زمانی ئینگلیزی لە دووتوێی (256) لاپەڕەدا چاپ كراوە، پاشان وەرگێڕدراوەتە سەر چەندین زمان.
لە بازنەی هەوڵەكانی وەرگێڕی بە توانا شەفیقی حاجی خدر لە وەرگێڕانی ناوەڕۆكی كتێبە دانسقە و گرنگەكان بۆ سەر زمانی كوردی، ئەم كتێبەیە بە ناونیشانی: (ئاوەزنامە .. 11 وانە لە ماهاتما گاندیی باپیرمەوە) لە زمانی ئینگلیزییەوە وەرگێڕاوەتە سەر زمانی كوردی و لە دووتوێی (317) لاپەڕە، ساڵی 2025 چاپ کراوە.
پێشەكی كتێبەكە بە زمانی كوردی بە پێشنیازی وەرگێڕ و سێ بابەت لە نووسینی فازیڵ شەوڕۆ، شێرزاد حەسەن و دكتۆر محەمەمەد تەها حوسێن، دەربارەی گاندی و فەلسەفەی ناتوندوتیژی و گرنگی ناوەڕۆكی ئەو بابەتانەی ئارون گاندی باسی كردوون دەست پێ دەكات، ئینجا گێڕانەوەكانی ئارون گاندی بە زنجیرە بە دوای یەكتردا دێن.
ئارون گاندی لە تەمەنی دوانزە ساڵییەوە تاوەكو شازدە ساڵی لە هندستان لە خزمەت گاندی باپیرەیدا بووە، لە میانەی كتێبەكەیدا یانزە وانەی گرنگ و پڕبایەخ دەگێڕێتەوە. ناونیشانی وانەكان بریتین لە: تووڕەیی بۆ چاكە بەكاربهێنە، لە قسەكردن مەترسە، قەدرزانی تەنیایی بە، بەهای خۆت بزانە، درۆ بەڕەلڵاییە، بە فیڕۆدان توندوتیژییە، دایبابێتی ناتوندوتیژانە، خاكەڕایی هێزە، پێنج ستوونەكەی ناتوندوتیژی، تۆ تاقی دەكرێیتەوە و وانە بۆ ئەمڕۆ. هەریەك لەو چیرۆك و بە سەرهاتانەی نێو ئەو كتێبە بۆ سەردەمی خۆی و بۆ تەواوی جیهان لە ئێستاكەدا مایەی بایەخ و پێزانییە، دەكرێت لە بواری سیاسی، ئابووری، كۆمەڵایەتی، پەروەردەیی، خێزانی و...هتد، سوودیان لێ وەربگیرێت.
شەفیقی حاجی خدر وەك هەنگاوەكانی دیكەی لە بواری وەرگێڕاندا، ناوەڕۆكی ئەو كتێبەی بە كوردییەكی پاراو پێشكەش بە خوێنەران كردووە، هەوڵ و كۆششەكەی مایەی دەستخۆشی و پێزانییە، كتێبخانەی كوردی دەبێت شانازی بەو بەرهەمەوە بكات.
دواجار دەڵێت جێی خۆیەتی هانی خوێندەوارانی كورد لە ژن، پیاو، پیر، گەنج بە هەردوو رەگەز، هەموو توێژەكان بدرێت دەست بە خوێندنەوەی ئەو كتێبە بکەن، بە وردی لە ناوەڕۆكی چیرۆك و بەسەرهات و پەندەكانی ناو كتێبەكە رابمێنن و لێی تێبگەن و هەوڵی ئەوە بدەن لە ژیانی رۆژانەیاندا بەرجەستەی بكەن، بۆ ئەوەی كۆمەڵگای مرۆڤایەتی دوور لە توندوتیژی، بایەخ بدا بە بەها مرۆڤایەتییەكان.
